Otro luna Corte Superior ta trata caso di Danies

ORANJESTAD (AAN): Door di e situacion di pandemia, Hof di Corte Superior a scoge pa mihor haci casonan den apelacion via video conference.

Ta asina cu recien Hof a haci e caso pro forma di R. Danies, kende a worde condena na mas di 12 luna di prison pa 9 acusacion contra dje. Danies a apela e sentencia y Hof a dicidi cu otro luna lo bay trata e apelacion.

   Na Maart 2012, Hues di Corte den Promer Instancia a dicta sentencia den e 11 acusacionnan cu Ministerio Publico a cuminsa contra Danies. Fiscal exigi 98 dia di prison condicional pa e 7 violacion di toque de queda cu un tempo di prueba di 3 aña.

   Fiscal a stipula e condicion cu Danies lo mester cay bou guia di Reclasering y cu si ta necesario e mester haya tratamento di psychiater. Tambe Fiscal a exigi 270 dia di prison, cual ta mas o menos 9 luna di prison.

   NO PROBA MENAZANAN DI MORTO: Hues a bisa cu e no ta haya proba cu Danies a menaza su mama y omo cu morto. Hues a mustra cu dia 1 December 2019, e mama di Danies a haci denuncia di menaza di morto contra di Danies.

   Na opinion di Hues, no tin prueba di sosten. El a sigui bisa cu dia 25 September 2020, e omo a haci denuncia di menaza. E omo di Danies a bisa cu su yiu na Hulanda a bis’e cu door di papia cu Danies a compronde cu Danies a menaza cu morto.

   Hues ta haya cu aki tampoco no tin prueba pasobra no a scucha Danies expresa esaki.

   NUEBE ACUSACION PROBA: Hues a sigui bisa cu e ta haya legalmente proba cu Danies, 5 biaha a causa destruccion di propiedad di Gobierno door di pinta “pro pedofile” riba propiedadnan di Gobierno.

   Hues ta haya cu un biaha, Danies a instiga grupo pa lanta. Tambe Hues ta haya cu Danies a menaza, resisti contra Polis y a ofende un agente di Polis. Ademas Danies a viola 7 biaha e toque de queda.

   CORTE A TUMA DANIES NA MALO:  Hues a bisa cu pa cu e castigo, e ta tene cuenta cu e comportacion y actitud di Danies durante tratamento di e caso. Tambe Hues a tene cuenta cu castigonan cu ta worde duna den casonan asina. Hues a mustra cu Danies a pinta pro-pedofiel riba propiedadnan di Gobierno y otro lugar. Ademas a menaza y ofende Polis.

   Hues ta haya cu Danies a tacha e agentenan di Polis nan bon nomber y mustra falta di respet. Hues a mustra cu Danies a lanta un grupo di hende su tras pa manifesta. Hues a tuma Danies na malo cu via live stream a laga kima lugarnan. Hues ta haya cu intencional Danies a keda sin mantene na reglanan pa evita cu ta plama Covid y cu esaki ta pone salud di comunidad na peliger.

   Hues a mustra cu e ta tene cuenta tambe cu anterior Danies a yega di worde condena pa cosnan similar y esey no a yuda trece cambio den Danies.

   TRATAMENTO DI PSYCHIATER: Hues a sigui bisa cu e raport di psychiater ta mustra cu Danies no ta bon di cabez y tambe e uso diario di marihuana.

   Psychiater a pidi pa tuma Danies menos responsabel pa su actonan. Psychiater a conseha guia di Reclasering y tratamento na Respaldo.

   Hues ta haya cu e tardamento di trece e caso Danies den Corte, a sobrepasa e periodo di proceso husto. Esey ta un violacion di e proceso husto y esey ta causa reduccion di castigo.

    CASTIGO DI PRISON Y PAGA DAÑO: Hues a condena Danies na 98 dia di prison pa viola 7 biaha e toque de queda. Pa e otro delitonan, 12 luna di prison di cual 3 luna ta condicional cu 3 aña di prueba.

   Hues a pone como condicional special cu Danies ta cay bou guia di Reclasering caminda Danies mester sigui indicacion di Reclasering y hasta si ta encera tratamento di psychiater. Ademas Hues a ordena pa Danies paga na dañonan causa cu ta suma mas cu 6 mil Florin y si e no paga e lo mester bay 140 dia sera den prison.