ORANJESTAD (AAN) – Otro reto cu CEDE Aruba a trece dilanti den su reunion cu Formador Evelyn Wever-Croes, ta e sistema di financia fundacionnan na Aruba.
Asina Daniel Tecklenborg a menciona den conferencia di prensa, despues di e reunion di dicho instancia cu Formador.
Desde hopi tempo, Tecklenborg a bisa, e sistema aki mester wordo moderniza. “Nos ta kere den procesonan hopi mas facil, menos burocratico, y tambe financiamento pa mas cu un aña. Mi ta kere cu e organizacionnan na Aruba mester tin e trankilidad di por haci nan trabao, y no cu cada bez tin inseguridad over di financiamento. Na Aruba hopi fundacion ta tuma un tarea cu, eigenlijk, ta tarea di gobierno, pero e ora ey nos cu zorg pa e fundacionnan haci nan trabao optimal. Anto, nos ta, na e momentonan aki, leu for di esaki. Mi ta kere cu ultimo tempo a purba di mehora e sistema, pero tin hopi caminda pa cana ainda, y nos tambe ta asegura cu nos ta willing como Cede Aruba, pa contribui na un desaroyo positivo di e sistema”, Daniel Tecklenborg a señala.
Otro aspecto cu Cede Aruba a trece dilanti ta e “capacity building” (creacion di capacidad) pa e fundacionnan.
“Aruba tin un cultura di boluntarismo y di organizacionnan cu ta contribui, pero nos mester prepara nos hendenan mucho miho, pa por ta cla pa un tarea asina, specialmente e generacion nobo. Nos a pensa den ki manera nos por prepara nos hendenan mucho miho pa drenta den un bestuur, pa haci uso di e tecnologia pa maneha un organizacion, pa recauda fondo, pa maneha boluntarionan, etc. E ta casi un estudio chikito cu tur hende cu kier drenta den un organizacion mester haci. Anto nos kier drag bay den e parti aki”, Director di Cede Aruba a expresa.
El a agrega cu banda di esakinan, Cede Aruba a trece varios tema dilanti, cu nan kier mira pa haya mas atencion durante e siguiente añanan.
“Nos a papia entre otro, riba un maneho nobo pa e Centronan di Bario, cu ta mas positivo pa nan, cu nan por florece mas; nos a papia di saneamento di debe den casnan priva, den nos famianan, mirando e problemanan financiero cu nos ta aden, pero tambe educacion financiero. Nos a papia di un sistema pa yuda nos famianan cu cuido di nos grandinan na cas, entre otro, adapta casnan na e situacion y trece e servicio mas cerca di cas. Nos a papia over di aumento di demencia na Aruba, y e necesidad di nos famianan pa atende cune; nos a papia di nos hobennan pa nan tin un lugar safe despues di scol, pa tin mas sosten mirando mayornan tin cu haci dos of tres trabao. Ta un reto pa nos hobennan pa nan tin un lugar sigur unda nan por wordo stimula positivamente. Nos a papia tambe di e problema di drops out den enseñanza, pa haci un investigacion mas profundo pa wak e factornan cu ta stroba nos hobennan pa caba scol. Anto, un bez cu nos tin bista riba esaki mester atende cu e factornan aki”, Daniel Tekclenborg a conclui.
