Otro logro ta e restauracion di cuido medico husto

Minister Mervin Wyatt Ras:

ORANJESTAD (AAN):  Despues di 100 dia, Gabinete AVP-Futuro ta wak bek cu orguyo riba e logro- y resultadonan, caminda cu determinacion lo sigui traha cu bista fiho na e siguiente fase di reconstruccion y renobacion.

Minister di Salubridad, Asuntonan Social, Cuido di Adulto Mayor y Maneho di Adiccion, drs. Mervin Wyatt-Ras, a felicita Aruba y Gobierno cu e logronan realisa den e prome 100 dianan di Gabinete AVP-Futuro: Husticia social y cuido pa mayornan.
Un di e logronan principal den e prome 100 dianan ta e prome aumento di 250 florin den e reparatietoeslag na casi 20.000 pensionado, y alrededor di 4.000 persona cu derecho di pension di viudo of di huerfano. Gabinete AVP-Futuro tin e compromiso cu e pensionadonan pa logra e aumentonan adicional den fase.

Otro logro ta e restauracion di cuido medico husto
A amplia e lista positivo di AZV cu un cantidad di remedi esencial cu awor AZV ta cubri bek y ta disponibel na botica sin pago adicional. E coreccion aki ta restaura e inhusticia di e medidanan di recorte tuma pa e gobierno anterior y ta enfatisa e meta di AZV como un proveedo social y e curason social di e Gabinete aki.

Ademas Ministerio di Salubridad Publico a percura pa proteccion pa famianan vulnerabel.
Pa e aña escolar nobo, e subsidio escolar, contribucion di mayornan y apoyo financiero pa mayornan cu ta den bijstand lo conoce aumento. Esaki ta yuda pa crea igualdad di oportunidad, derecho pa educacion y derecho pa un futuro cu miho perspectiva pa tur mucha, sin cu nan situacion socioeconomico ta obstaculisa nan.

Minister Wyatt-Ras a expresa di ta “contento y orguyoso di por traha hunto dedica na e pueblo di Aruba y cu curason na e caminda corecto”. Pabien Gobierno AVP-Futuro, pabien na nos parlamentarionan, pabien na un y tur cu e 100 dianan di logro den gobernacion.