Otro grupo feliz di Programa Piskechi a ricibi certificado

ORANJESTAD (AAN): E asina yama ‘Programa Piskechi’ bao auspicio di Santa Rosa y Ministerio di Sector Primario,

a sigui den fin di siman tambe.  E biaha aki, esaki ta Grupo #4.  Di e forma aki, a trece mas di Aruba su futuro piscadonan na e Pier di Brisas na Savaneta.

   Aki cada uno a haya chens di siña con ta prepara anzue, con ta traha cu e linea, y despues ta bay riba e Pier pa asina purba na gara pisca.

   Programa Piskechi ta encera un curso basico di pisca na man, y ta dirigi pa mucha- y hobennan entre 10 y 17 aña di edad.  E ta riba un Diasabra y un Diadomingo na e Pier na Savaneta.

   Ministro Geoffrey Wever tabata presente, y cu satisfaccion ta notando un generacion nobo cu amor pa lama y e arte di pesca na man.  Cu hopi orguyo el a felicita tur e muchanan cu a completa un otro edicion di Programa Piskechi y a ricibi nan certificado riba Diadomingo.

   Programa Piskechi ta hopi mas cu solamente siña e arte di pesca na man, e programa ta planta un simia di aprecio pa nos lama, nos naturalesa y nos tradicionnan.

   Ministro a duna danki na e partner Oasis Fishing, y especialmente Chito Rasmijn, pa e tremendo trabao y pabien na tur e participantenan cu nan bunita certificado.