Minister Gerlien Croes ta splica pakico e tardanza:
ORANJESTAD (AAN) Den entrevista cu DIARIO, Minister Gerlien Croes a splica cu pa añanan Aruba no tabata tin un Algemeen Investeringsfonds manera esun cu tin awo, cual gobierno AVP-Futuro a introduci.
E mandatario a indica cu prome cu esaki loke nan tabata haci ta presupuesta den e presupuesto cu nan ta pasa na December, y esey ta e presupuesto di e siguiente aña, cual ta bay di 1 di Januari te cu 31 di December di e aña respectivo.
“Hopi biaha, kico bo ta haya? Ora bo ta bay aanbesteding, por ehemplo pa un proyecto, y e destaho ta wordo gana, bo ta entrega e aanbesteding, pero e ora ey cada aña, na momento cu e presupuesto cera dia 31, bo tin cu presupuesta di nobo loke bo falta pa e siguiente presupuesto, cual por trece retraso den tur proyecto”, Minister Gerlien Croes a bisa.
E mandatario a agrega cu na momento cu AVP-Futuro a oficializa e gobierno, nan a bin cu e Fondo General di Inversion. “Kico e idea di e fondo aki ta? E idea ta cu e ta facilita e inversion. E fondo aki no ta mara na un fecha; e no ta mara na di 1 d Januari te 31 di December, El fondo ta keda core, kiermen e placa semper ta accesible. Kiermen, na momento cu bo cuminza cu un proyecto, bo no tin cu warda te cu e presupuesto bolbe pasa pa bo por sigui cu e proyecto”, Minister Gerlien Croes a subraya.
El a agrega cu hecho ta cu pa yega na formaliza e ley tabata tin tardanza, pa cana e proceso huridico, pa bay Juridische Zaken, Raad van Advies, y Staten.
“E proyecto ta cla pero e begroting acopla na dje, tambe tin cu wordo aproba door di Parlamento di Aruba. Nos a caba di contesta tur e preguntanan cu nos a haci riba locual ta e presupuesto di e fondo aki, y aworaki si tur cos ta bon, nos ta den man eventualmente di Staten, pa nan yama e reunion riba aprobacion di presupuesto” e dignatario a remarca.
Den e presupuesto aki, el a sigui splica, tin un lista di varios proyecto: tin presupuesto pa asfalta, pa continua cu e proyecto di MFA, y, por ehemplo, Arubahuis tin na e momento aki awo cu a yega na structura di edad, cu e ta exigi un cambio den e trabaonan di renovacion, kiermen eynan tambe mester a pone algo extra. “Pa Reina Beatrix School, e aanbesteding no a logra pasobra nan a bid mas halto di locual nos a presupuesta”, Minister Gerlien Croes a añadi.
El a señala cu pa e piscina pariba tambe a presupuesta 1.5 miyon, y a recorda cu tabata tin groundbreaking pa e tweede pool na Piscina Olimpico cu gobierno tin un acuerdo cu ne, cu tambe tey den.
Kiermen, na momento cu e presupuesto pa e fondo di invesion wordo aproba, tur e proyectonan menciona lo wordo ehecuta, segun Minister Gerlien Croes.
