Otro edicion exitoso di Accion di Bario den Caya Bonaire y e area rond di Village

ORANJESTAD (AAN): Diahuebs mainta, Prome Minister Mike Eman a participa den un otro edicion exitoso di Accion di Bario den Caya Bonaire y e area rond di Village.

Hunto cu representantenan di Serlimar, City Inspector, DVG, KPA, GKMB, DOW, Departamento di Asunto Social, Luna Foundation y FCCA, e Prome Minister a bishita diferente punto den e bario pa scucha di cerca e preocupacionnan, sugerencianan y necesidadnan di e habitantenan.

Durante e bishitanan, hopi residente a expresa nan aprecio pa e presencia directo di Gobierno den e barionan. Varios ciudadano a comparti cu nan a sinti falta di mira Gobierno y su representantenan cerca di nos comunidad. E reaccion positivo a resulta evidente ora cu despues di e conversacionnan cu Prome Minister Eman, varios habitante a sali for di nan cas pa yuda haci limpi y mehora nan entorno.

Un di e prome paradanan durante Accion di Bario tabata na cas di Michael Clark, un habitante ampliamente conoci den Village pa su dedicacion y amor pa su bario. Pa hopi aña, Michael a contribui activamente na mantencion y limpiesa di comunidad, semper dispuesto pa duna un man y motiva otro habitantenan pa cuida nan entorno. Prome Minister Eman a reconoce e balor di ciudadano manera Michael Clark, cu ta demonstra cu compromiso personal por haci un diferencia real den un comunidad. Segun Eman, e desaroyo di un bario no ta depende solamente di Gobierno, sino tambe di habitantenan cu ta sigui traha pa un comunidad mas fuerte, uni y orguyoso.

Durante e encuentro, e Prome Minister a comparti informacion tocante diferente proyecto cu recientemente a wordo realisa den San Nicolas. Entre esakinan ta e mural artistico di homenahe na Julio Bernardo Euson, situa riba e edificio di Chocolate City Bar & Restaurant na Bernhardstraat. Un otro logro importante den e mesun Bernhardstraat ta e reconocemento oficial di e edificio di Iglesia Adventista di Shete Dia como monumento. E designacion aki a habri caminda pa un proyecto di restauracion cu ta busca preserva e herencia historico, arkitectonico y religioso di e edificio pa e futuro generacionnan. Prome Minister Eman a anuncia tambe cu e trabounan di revitalisacion di Bernhardstraat lo cuminsa diasabra, cu enfasis riba mehora e aspecto visual di e area, incluyendo fachadanan cu colornan mas anima y atractivo.

Ademas, e Prome Minister a bishita e trabounan di renovacion cu Gobierno di Aruba, hunto cu FCCA, ta realisando na 141 cas den Village. E proyecto aki ta contribui directamente na mehora e condicionnan di bida di hopi famia y ta fortalece e calidad di vivienda den comunidad. 

Durante su recorido, Eman a recorda e comunidad tocante e apertura oficial di e prome Zona di Desperdicio Permanente na Barcadera, cu a habri su portanan na cuminsamento di juni. E facilidad aki ta forma parti di un esfuerso mas amplio pa modernisa e maneho di desperdicio na Aruba y ofrece ciudadano un opcion accesibel y pa deshaci di desperdicio.

Prome Minister Eman a conclui e actividad na gradici tur habitante, boluntario y organisacion cu a aporta nan tempo, energia y compromiso durante e jornada. “Hunto nos por sigui construi barionan mas limpi, sigur y organisa, unda calidad di bida y orguyo comunitario ta ocupa un lugar central,” Eman a expresa.