Richenel Stamper, PR di DPL ta splica:
ORANJESTAD (AAN)—Centro di Bario Noord, hunto cu CEDE Aruba, ta organizando un charla informativo, y DPL ta invitado pa papia tocante e tema di Entrevista Laboral. E charla aki ta gratuito, lo tuma lugar Dia 4 di September proximo, di 7’or pa 9’or di anochi, den Centro di Bario Noord.
Asina señor Richenel Stamper, Relacionista Publico di Departamento Progreso Laboral (DPL), a duna di conoce den entrevista cu Matutino DIARIO.
“E tema aki ta uno sumamente importante, pues, nos a tuma e invitacion aki cu braza habri, y nos ta di opinion cu e tema di Entrevista Laboral ta algo cu tin un necesidad hopi grandi pa bin dilanti, den nos comunidad”, Richenel Stamper a señala.
El a agrega cu e iniciativa aki di Centro di Bario Noord ta di aplaudi, y tambe pa DPL coopera cu nan.
“Esaki ta algo cu hopi biaha nos ta wak, por ehemplo, esnan cu ta buscando un trabao sea cerca nos of otro instancianan cu tin eyfo, no tin e informacion di kico ta un Entrevista Laboral. Kico mi mester tin pa pasa un entrevista cu exito. Awendia, si bo no bay entrevista e chens ta minimo, cu bo ta haya un trabao. Banda di esey, mayoria di companianan mediano y grandi, ta exigi mas cu un entrevista laboral, pa nan haya e trabao”, Richenel Stamper a splica.
El a agrega cu e no ta papiando aki di funcionnan halto of di manager, sino cualkier posicion, incluso e funcionnan mas basico ta exigi minimo, dos entrevista laboral, prome cu nan tuma e decision si bo ta keda aden, den esnan cu lo tuma den servicio.
Esey tin di haber cu varios factor. Uno ta pa purba di conoce e persona un tiki mas. “Nos sa cu den un entrevista laboral nos ta purba di bende nos mes y bisa e cosnan mas miho di nos mes, claro! Pero, den un entrevista, eigenlijk, e Recurso Humano ta purba di conoce bo, haya un taste di ken bo ta, realmente, y mester bisa tambe cu un di e factornan principal cu ta pisa hopi awendia, ta bo actitud como persona.
