Oriana Mansur a wordo premia cu prestigioso ‘Rising Star Award’ na New York

Un dama hoben di Aruba ta destaca na mundo financiero na Merca

ORANJESTAD (AAN): Informacion for di New York ta indica cu un evento a ser teni recien pa un celebracion notabel di liderato, excelencia, y e futuro di muhenan den sector financiero, y aki e dama Oriana Mansur a wordo premia cu e prestigioso Rising Star Award, presenta door di Women’s Bond Club.

   E premio aki, cu ta wordo entrega durante un di e eventonan mas importamte di e organizacion na Manhattan, ta reconoce profesionalnan emergente kendenan a demostra un liderazgo excepcional, cu logronan profesional, y cu e potencial di converti nan mes den bosnan di influencia dentro di e industria di servicionan financiero.

   Funda na aña 1921, Women’s Bond Club ta un di e organizacionnan mas bieu y respeta dedica na avance di muhenan den sector financiero y di servicionan financiero na New York City.  Durante mas di un siglo, e organizacion a sirbi como un network solido di mentor, desaroyo di liderazgo, y crecimento profesional, treciendo hunto ehecutivonan exitoso y profesionalnan cu ta creciendo di algun di e institucionnan financiero mas importante di mundo.

   E premio di ‘Rising Star’ ta wordo otorga solamente na personanan selecta cu ta destaca entre nan demas coleganan pa nan talento, dedicacion, calidad di liderato, y potencial pa futuro impacto den e industria.  E programa ta goza di gran prestigio den comunidad financiero, y ta inclui coaching di liderato, oportunidadnan di network, y reconocemento entre top ehecutivo y companianan di Wall Street y e sector financiero en general.

   Pa Oriana Mansur, ricibimento di e premio aki no ta djis representa excelencia profesional, sino tambe e culminacion di hopi aña di trabao duro, determinacion, y compromiso cu e crecimento den un sector cu ta hopi competitivo.  Su reconocemento ta refleha e balornan cu Women’s Bond Club ta defende: integridad, liderato, inovacion, y e avance di e futuro generacion di muhenan lider.

   Famia, amigo-, y coleganan na forma di orguyo ta celebrando e logro di Oriana como un etapa cu ta destaca tanto su dedicacion personal como e briyante futuro cu ta sperando su dilanti.  Pa wordo reconoci na New York City pa un organizacion asina historico y di influencia, ta pone wordo ubica den un grupo di elite di hobennan profesional cu ta yudando pa duna forma na e futuro di finanzas.

   Mientras cu Women’s Bond Club ta sigui cu su mision di siglo-largo di empodera muhenan y fomenta liderato, e premio Rising Star otorga na Oriana Mansur ta sirbi como testimonio di e futuro generacion di profesionalnan cu talento cu ta lagando un impacto significante den mundo financiero.

   Oriana ta yiu muhe di director di DIARIO, Jossito Mansur.