E caso di barco Aressa na Aruba tambe a contribui
ORANJESTAD (AAN): Siman a habri cu e informe procedente di Spaña pa cortesia di Guardia Civil, cu a indica cu danki na un investigacion di diferente fuente hudicial na Europa cu a cuminza na aña 2018 ora cu a haya 840 kilo di cocaina den un barco mara na islanan di Azores, como tambe e famoso caso di 5.100 kilo di cocaina haya abordo di e barco di carga ‘Aressa’ cu tabata pasando cerca di Aruba, e investigacion a keda lora te cu a logra desmantela full e red di narcotraficantenan aki na Europa.
Segun Guardia Civil di Spaña, e operacion aki a wordo coordina door di Europol y di e forma ey nan a infiltra y kibra completamente un organizacion criminal cu tabata haci trabao pa importa cargamentonan grandi di cocaina via di lama na Europa. En total a pone man riba 29 persona cu a keda deteni, y a confisca mas di 6 ton di cocaina, di cual mayoria di esey tabata na Aruba.
Guardia Civil di Spaña a bisa cu e operacion aki den cual a participa tambe Polisnan di Croacia, Italia, Montenegro, Hulanda, Portugal, Serbia, y Slovenia, a uni forza pa asina intercambia di detayenan importante pa asina logra yega na e cabezante di e grupo.
E cabezante di e gang criminal aki tabata un miembro di e conocido organizacion criminal italiano di Ndrangheta, aunke mayoria di su miembronan ta di origen di Montenegro, segun Guardia Civil.
Ademas di a confisca 6.1 ton di cocaina, nan a pone beslag riba miles di Euro cash, varios vehiculo, barco, y un arma cu municion.
Investigacion di 4 aña: A ser specifica cu e investigacion a cuminza na aña 2018 na momento cu autoridad di Portugal a haya 840 kilo di cocaina scondi den un barco na Azores. Despues tabatin mas caso cu a haya droga abordo di barconan na Spaña, y tambe Costa Marfil cu varios detenido.
E caso cu a confisca droga aki tabata importante pa asina Europol por a cuminza ‘Operacion Florida 1”, via di Polisnan di Montenegro. Bao di Operacion Florida 1, nan tabata vigila e movimento di e barco Aressa cu a sali for di Venezuela rumbo pa Grecia.
Asina cu el a sali for di awanan teritorial Venezolano y pasa cerca di Aruba, autoridad di Montenegro via di Europol a pidi yudanza di Husticia Hulandes. Esaki mesora a manda relato urgente pa Islanan ABC, unda cu Guardacosta di Caribe Hulandes riba Dialuna 25 di Februari 2020 a haya e orden pa nan actua y bay wanta e barco.
Tur cos tabata basta trankil e Dialuna ey 25 di Februari 2020 riba lama rond di Aruba. Despues cu nan a wordo adverti di presencia di e barco sospechoso Aressa, mesora RCC di Guardacosta di Caribe Hulandes a cuminza vigila su radar.
E barco Aressa tabatin su AIS-System cendi, y aki RCC di Kustwacht por a identifike como “Aressa”, nabegando bao bandera di Cameroon. E barco aki cu tin un largura di 95 meter, no a registra ningun rato riba e AIS-System cu e tabata di bishita na Venezuela. Su ultimo posicion duna ta Suriname, y cu for di eynan e mester viaha pa Grecia.
E caso di barco Aressa: Pero for di e radar, por a nota cu e ta biniendo for di area di Punto Fijo (Venezuela). Ta comosifuera cu e barco aki intencionalmente a trata na ‘sconde’ su presencia den awanan teritorial
A sali na cla, cu e barco Aressa tabata mara na Waf di Guaranao (cerca di Punto Fijo) y a sali Diadomingo 24 di Februari 2020 pa 5:00 pm di eynan, pa bay lama grandi y haci comosifuera cu “awor si” e ta rumbo pa Grecia.
E actitud sospechoso aki, y posiblemente acompaña pa informe di inteligencia, a pone cu Guardacosta di Caribe Hulandes a mobiliza pa e area unda e barco Aressa e momento ey ta moviendo cu su velocidad maximo.
Ora cu a topa cu e barco riba lama, mesora Guardacosta a duna e capitan ordo pa stop, y asina a bay abordo pa investiga un que otro cu e barco sospechoso aki, principalmente e pregunta di con nan a keda ‘scondi’ for di ora cu a sali di Suriname y no a broadcast nada cu nan a bin Venezuela.
Mientras tanto solo a baha y a bira scur, y keto bay oficialnan di Guardacosta riba lama tabata abordo di Aressa pa sigui haci un investigacion preliminar, y a bin descubri cosnan eyden cu no ta cuadra.
Finalmente e lidernan di Guardacosta a dicidi, cu ta bay cune rumbo pa Waf di Oranjestad na Aruba pa asina nan haci un mihor investigacion, incluyendo mas personal, equipo, y tambe K9 pa listra esaki.
Den oranan di madruga, e barco a yega Waf di Oranjestad, y a duna ordo pa e bay mara na Dok-G cu ta keda net un tiki pazuid di Citgo Boulevard. Mesora hunto cu personal specializa, a bay haci un investigacion.
Aki ta unda cu a descubri cu e barco aki lo a yena tur espacio disponible cu droga. Tanto autoridad local, personal di Guardacosta, y Ministerio Publico a keda babuca pa topa cu asina hopi droga den dje. Con por ta cu ningun oficial na Punta Cardon y Punto Fijo no a ripara cu tabata yenando droga den e barco aki?
Mesora e Capitan y e tripulantenan a keda deteni, y a baha nan for di e barco (11 persona). Nan a ser hiba pa Wardanan di Polis riba e isla, pa nan wordo cera y pa asina start cu e proceso di interogacion. Nan tur ta di nacionalidad di Montenegro.
Via di Europol tabata sigui haya informacion valioso di inteligencia di Montenegro. Casi henter dia autoridad a traha pa saca tur e droga for di e barco Aressa, mientras e tabata ancra na Waf di Playa mey-mey di dos barco crusero. E droga a wordo saca y hiba pa Marinierskazerne pa vigilancia. A sali na cla cu abordo e tabatin un carga di 5.1 ton di cocaina.
A haya varios documento, pero tur esaki ta na idioma di Montenegro cu tabata dificil pa traduci. Debi na e hecho cu Pandemia a start poco despues, tabata dificil pa keda cla na tempo cu traduccion di material cu tabata pidi via canalnan oficial na Montenegro.
Mientras tanto Corte na Aruba a trata caso di e tripulantenan. Pa e Capitan di inicial Z.D. a duna castigo di 15 aña di prison. Nuebe tripulante a haya 12 aña di prison. E Chief Engineer di inicial M.D. a haya 9 aña di prison so, pasobra el a dicidi na duna informacion valioso di henter e asunto.
