Prijs di productonan lo baha bek?
ORANJESTAD (AAN): Minister di Asunto Economico, Comunicacion y Desaroyo Sostenibel, mr. Geoffrey Wever, den un conferencia di prensa dialuna mainta, 8 di augustus, a confirma e noticia cu gasolin y diesel lo baha substancialmente entrante 10 di augustus.
Aki ta papia di un reduccion di 42.5 cent (12.7%) pa gasolin, y un reduccion di 34.2 cent (10.9%) pa diesel per liter.
E ta un costumber (den pasado) cu ta haci publicacion cu insinuacion y motivacion politico ora minister mester anuncia cu prijs di gasolin ta subi. Mientras cu e noticia di reduccion di prijs sigur ta uno hopi bon pa pueblo, minister Wever kier tuma e oportunidad positivo pa asegura un bes mas cu esaki tin di haber cu e desaroyo internacional den industria petrolero.
Minister Wever ta contento cu e reduccion, mirando su efecto positivo riba e homber chikito, pero segun e mandatario “un bes mas nos ta ser recorda cu Aruba ta na misericordia di desaroyo internacional. Nos mester uza e oportunidad pa recorda pueblo e importancia di desaroyo sostenibel, den energia y otro aspectonan tambe.”
Aruba mester comprension y cooperacion pa cu e desaroyonan cu mester tuma luga pa hiba nos pais riba un rumbo mas sostenibel, unda nos por cuminsa bay den direccion di reduci nos Pais su dependencia riba factor nan externo. Esaki lo yuda nos como Pais ta mas fuerte y preveni situacionan cu afecto (negativo) grandi pa henter comunidad.
Por a compronde cu varios negoshi a aumenta nan “Tarifa di Delivery” ora cu gasolin a subi drasticamente ultimo lunanan. Awor e pregunta cerca hopi hende ta, si acaso nan lo bay reduci esaki tambe awor cu gasolin ta baha asina drastico na Aruba.
