Organisacion OPPA ta bay celebra su di 36 Aniversario

ORANJESTAD (AAN): Tabata exactamente 36 aña pasa un grupo di pensionado Publico a sinti e necesidad di tin un representacion den comunidad.  

Dia 26 augustus 1988, Organizacion di Pensionado Publico di Aruba, OPPA, a ser funda.

   OPPA e tempo ey tabatin apenas 59 miembro bao guia di sr. Julio Anthony Dorothal. E contribucion pa e miembrecia e tempo ey tabata apenas 5 Florin.

   OPPA a cuminsa y tabata duna conseho na e miembronan y ta yuda cu asistencia huridico te unda ta posibel y necesario.  Durante e añanan e miembrecia a sigui crece.

   Na e di 33 Aniversario, den temporada di Covid-19, cu hopi orguyo y esfuerso e directiva di e tempo ey a logra nan mesun edificio cu ta hiba e nomber di CAS DI OPPA.

   Actualmente OPPA ta conta cu casi 1.600 miembro y miembrecia awor ta solamente 10 Florin pa luna.

   Ta hopi charla y actividadnan OPPA ta organiza pa e miembronan den den Cas Di OPPA y fiesta bailabel riba e conocido Plenchi di OPPA.

   Pa celebra e di 36 aniversario di OPPA, ta organizando un Tropical Lunch Dansant cu lo bay ta Diasabra dia 24 augustus, di 10:00 am pa 3:00 pm.  Pa mas informacion por yama oficina di OPPA entre 9:00 am te 12:00 pm di Dialuna pa Diabierna.