Anouk Eman eligi como Miss Universe Aruba 2024

ORANJESTAD (AAN): Diasabra anochi durante un actividad di gala den Ballroom di Marriott Aruba Resort & Stellaris Casino,

e organizacion di My Dream Institute encarga pa organiza e certamen di Miss Universe Aruba 2024, a pone seis candidata riba escenario pa asina competi pa e titulo maximo.

   E anochi a culmina na momento cu maestronan di ceremonia Tarrick Ras y Angie Dirks a anuncia e Top 2 candidatanan, y na final tabatin gritonan di alegria den publico ora cu Anouk Eman a keda eligi.

    El a wordo instala door di Ministro di Cultura Xiomara Maduro, y a wordo corona door di Ministro Ursell Arends.  Anouk Eman a bay cu premio tambe di candidata mas impresionante, candidata mas inspirador, premio tambe di candidata cu mihor makeup pa night-look, a gana tambe e social media challenge di Miss21, tambe a gana prome premio di Photo Shoot Challenge.

   Prome finalista di e certamen a bira Giulia Brezovar.  Giulia a bay tambe cu e premio di candidata mas elegante.

   Anouk Eman lo ta preparando pa participa den certamen di Miss Universe 2024, cu e aña aki ta tuma lugar na November venidero na Mexico.