ORANJESTAD (AAN): Oranje Fonds ta inicia su buskeda pa projectonan special cu por yega na remarca pa gana un Appeltje van Oranje 2022.
E tema e aña aki ta Oportunidad Igual pa tur hoben. Oportunidad Igual ta un problema urgente den nos comunidad, cu a bira mas grandi pa motibo di e crisis di corona. E aña aki Oranje Fonds kier uza e “Appeltjes”nan pa enfoca riba projectonan cu ta aborda e problema aki na un manera exitoso, pasobra nan merece apoyo y reconocimento. Organisacionnan por inscribi te cu dia 30 di september pa yega na remarca pa gana un Appeltje pa medio di oranjefonds.nl/appeltjes. Den luna di mei 2022, tres iniciativa lo ricibi un premio for di man di Rey Willem-Alexander.
Lamentablemente no ta algo comun cu tur hoben ta haya oportunidad igual. E desigualdad entre diferente grupo di hoben ta subiendo, esaki segun diferente estudio. Pa motibo di e pandemia e problemanan aki a bira mas grandi y mas visibel. Hobennan ta wordo mas y mas perhudica door di hopi cos cu a cay afo, manera enseñansa, lugarnan pa core stage, trabou (fiho), entrada, structura y contactonan social.
Na cas nan ta haya mas stress ya cu nan lo por wordo confronta cu por ehempel aumento di violencia domestico, nan ta sinti nan mes isola y ta perde perspectiva. Asina ta surgi gruponan di hoben vulnerabel.
Muraya invisibel
Segun un rapport di Sociaal Cultureel Planbureau [Organismo di Planificacion Sociocultural] for di 2019 riba oportunidad y obstaculo bou hoben, ta existi e riesgo di un ‘muraya invisibel’ entre hobennan cu y esnan sin recurso of ayudo. Algun di nan lo probecha di e oportunidad, otronan ta keda dal nan cabes contra muraya.
Di e forma aki, hobennan cu tin suficiente recurso economico y social tin mas posibilidad pa capitalisa nan oportunidadnan. Recurso social den esaki, ta bira cada bes mas importante: esnan cu rednan adecua ta yega mas leu den bida. Asuntonan manera educacion y origen – unda bo a nace, ken ta bo mayornan, di unda nan ta bin y ki trabou nan ta haci – ta hunga un rol, mescos cu prehuicio (inconsciente), exclusion y discriminacion.
Hobennan di mes edad
Afortunadamente tin hopi organisacion cu ta lucha pa brinda tur hoben oportunidadnan igual. Y Oranje Fonds ta en busca di e projectonan excepcional aki, cu ta emplea hoben pa yuda nan compañenan bay dilanti. Pa brinda nan e reconocimento cu nan merece.
Pa cu esaki, nos tin cu pensa riba ‘projectonan amigo’ cu ta uni hobennan cu otro, un iniciativo cu ta laga refugiadonan hoben topa cu otro of un projecto cu pa medio di boluntarionan hoben, ta duna sosten na hobennan LHBTIQ+. Duna organisacionnan informacion di esaki of registra un organisacion di biaha pa participa y gana, ta posibel desde awor riba oranjefonds.nl/appeltjes.
Premio
Tur aña ta haci entrega di Appeltjes van Oranje na tres iniciativa cu exitosamente ta uni diferente grupo di persona cu otro of cu ta percura pa hende por participa atrobe den comunidad. Cada ganador di un Appeltje van Oranje ta ricibi un statua di brons, traha pa Prinses Beatrix, y un suma na balor di 25.000 euro.
Tur aña Reina Maxima ta otorga e premionan. Den añanan bisiesto esaki ta keda efectua pa Rey Willem-Alexander. E aña aki lo ta di 20 bes cu Appeltjes van Oranje ta keda otorga.
Oranje Fonds
Ta deseo di Oranje Fonds pa ningun hende keda exclui y pa tur hende participa den comunidad. Pesey nos ta fortifica y uni tur organisacion, boluntario y colaborador cu ta contribui na un sociedad uni. Ta haci esaki danki na e sosten di entre otro Nationale Postcode Loterij, Nederlandse Loterij, Onze Vrienden y diferente otro socio. Rey Willem-Alexander y Reina Maxima ta e pareha protector di Oranje Fonds.
Potret: Oranje Fonds
