Evelyn Wever-Croes relaciona cu maneho di Covid:
ORANJESTAD (AAN): "Si nos a keda den lockdown, cu shutdown desde aña pasa Maart, mi no ta kere nos lo tabata para akinan mas. Nos tur lo a muri y e pais aki lo a kibra", asina Prome Minister Evelyn Wever-Croes a expresa riba un pregunta di un miembro di prensa diasabra ultimo.
El a agrega cu e a maneho cu a bin ta haciendo gobierno ta para su tras. A tuma e decisionnan corecto na e momentonan corecto. Ta bin cu algun medida manera toque de queda, cual ta un medida cu ta bay hopi leu unda ta inhibi e libertad di un ciudadano di por move. Esaki no ta cosnan cu por haci 'a la ligera', e mandatario a enfatisa.
E mandatario a splica cu si hospital no a bati alarma no lo a bay asina leu di tuma mas medida. Si den un lapso di tempo cortico Aruba ta haya un avion cu 100 enfermero of specialistanan pa atende cu cuido intensivo y tin suficiente espacio, e ora lo por baha atrobe e presion.
E medidanan cu a wordo tuma pa algun hende, esaki ta afecta nan den nan curason, ya cu ta afectando economia y comercio di e pais. Pero di otro banda tin un grupo di hende cu ta haya cu esaki tampoco no ta suficiente ainda. Sinembargo no por complace tur hende y esey ta un les cu a siña for di 13 di Maart 2020, a bisa.
E decisionnan ta wordo tuma a base di datonan, cifranan y esey ta locual a bin ta haciendo, Wever-Croes a expresa.
