Orange Aruba ta cla pa inicia campaña di conscientisacion pa un Aruba sin violencia

Orange Aruba ta cla pa inicia campaña di conscientisacion pa un Aruba sin violencia

Esther Broeksema di FCVR:

ORANJESTAD (AAN): Comision di Orange Aruba ta cla pa duna inicio na e campaña global Orange the World. E campaña di UN Women tin como meta pa elimina violencia contra hende muhe y mucha muhe. E 16 Dianan di Activismo ta cuminsa 25 di november, Dia Internacional di Eliminacion di Violencia contra Hende Muhe, y ta termina 10 di december, Dia di Derecho Humano.

   Esther Broeksema, presidente di FCVR, a splica cu durante e 16 dianan aki, e campaña ta yama atencion na nivel mundial pa e problematica di violencia contra hende muhe y mucha muhe. E color oranje ta simbolisa speranza pa un futuro sin violencia. Segun Broeksema, e mensahe di Orange the World ta un yamada pa traha hunto y lucha pa un mundo sin violencia.

   Na Aruba, e campaña ta hiba e nomber Orange Aruba y su mensahe ta abarca tur forma di violencia. “Nos ta traha y lucha pa un Aruba sin violencia. Esaki ta encera tur tipo di violencia”, Broeksema a expresa.

   E comision di Orange Aruba ta consisti di FCVR, Departamento di Asunto Social (DAS), Centro di Desaroyo di Hende Muhe (Cedehm), Bureau Sostenemi, Fundacion Respeta Mi y Soroptimist International Club Aruba (SICA). E instancianan aki ta traha hunto pa duna contenido na e 16 Dianan di Activismo y conscientisa comunidad riba e tema di violencia.

   Cu Orange Aruba, e comision ta invita comunidad pa sigui papia di violencia, reconoce su señalnan y brinda sosten na esnan cu ta enfrenta e situacion aki. E 16 Dianan di Activismo ta un oportunidad pa fortifica e compromiso cu prevencion y sigui traha durante henter aña pa un Aruba sin violencia.