Cachonan brabo na Angochi a ataca y destrui tire di un auto

ORANJESTAD (AAN): Ultimo temponan casi ta imposible pa bishita habitantenan cu ta biba den cierto area di Angochi.  Pa colmo, awor hasta joggers ta trata di evita di pasa den e areanan ey.

   Esey ta bin debi cu tin algun cacho los riba caya cu ta kere cu e pida caminda ey ta pertenece na nan!  Nan ta ataca tur jogger, tur ciclista, y den fin di siman nan a hasta ataca un vehiculo sedan cu tabata pasando, y a destrui su tire di auto.

   E informacion aki a wordo confirma pa e dama cu ta doño di e auto.  El a splica cu Diadomingo anochi laat e ta coriendo riba e caya di Angochi ora cu diripiente el a wordo ataca door di un tropa di cacho.  E mes ta stima animal, pues el a brake ora cu e cachonan a manera cuminza bula riba su auto.

   El a stop y aki ta unda cu e cachonan a baha nan rabia riba e tire di autonan, principalmente e wiel y tire dilanti banda drechi.  Nan a cuminza kauw e tire aki, y cu nan diente a crea varios buraco den e sidewall.

   Aki ta unda cu e dama a dicidi na primi trot pa evita cu e cachonan ta causa mas daño na e vehiculo.  Pero ya tabata laat!

   E mordi na e sidewall di e tire, a pone cu e wiel aki a bira plat.  Y como cu ta e na banda, el a afecta y destrui e wayanan den e carcass di e tire eynan.  Pues e tire nobo ey no por wordo usa mas, y e dama a haye ta cumpra full un tire nobo.

   E situacion aki den bario di Angochi ta peligroso!  Aunke a pasa ley di cacho, toch parce cu ningun hende den e area ta worry cu e ley.  Kizas e momento a yega pa Bureau City Inspector pasa check e situacion aki, pa asina cuminza actua contra esnan cu no ta cumpli cu reglamento y cu e ley di cacho.