Gobierno a reuni cu organizacionnan pa incentiva participacion na Dia Nacional pa Cuida Aruba

ORANJESTDAD (AAN): Siman pasa, Gobierno di Aruba a tene un reunion na Bestuurskantoor pa informa y incentiva organizacionnan y

boluntarionan pa uni na Dia Nacional pa Cuida Aruba. Prome Minister Mike Eman tabata presente na e encuentro, hunto cu e representantenan di diferente organizacion den comunidad.

   Durante e reunion, Gobierno a splica e meta y organizacion di Dia Nacional pa Cuida Aruba. E iniciativa ta invita henter pueblo pa pone man na obra y contribui activamente na limpiesa, cuido y embelesemento di nos isla. Ademas di haci limpiesa, e dia tin como meta crea mas concientisacion tocante e responsabilidad di nos tur pa conserva Aruba limpi y bunita.

   Daniel Tecklenborg, Diretor di CEDE Aruba, a indica cu limpiesa no ta solamente responsabilidad di Gobierno, sino tambe di cada habitante, organizacion y compania den comunidad. Segun Tecklenborg, dedica un dia nacional na cual tur hende por pone man na obra ta un bon idea pa fortalece cooperacion den comunidad. CEDE Aruba ta sostene e iniciativa pa medio di su contacto cu organizacionnan den bario y su plataforma di boluntariado. E organizacion por yuda mobilisa gruponan di boluntario, identifica e areanan cu ta exigi mas atencion y propone e puntonan di coleccion pa facilita e actividadnan.

   Dave Martinus di Scouting Aruba a califica Dia Nacional pa Cuida Aruba como un excelente iniciativa pa tene nos isla limpi y crea mas concientisacion, especialmente cerca nos hobennan. Scouting Aruba ta mira e dia como un oportunidad pa siña muchanan, for di edad chikito, cu cada persona tin un papel importante den cuido di su ambiente. Martinus a expresa e deseo pa e iniciativa yega na scolnan y barionan, pa asina cuido di Aruba bira un compromiso permanente y sostenibel den henter comunidad.

Angelique Perez di Sonrisa a confirma cu e organizacion ta preparando pa participa activamente. Sonrisa lo mobilisa su clientenan y boluntarionan, hunto cu Trampolin pa Trabao, Scouting Aruba, Sonrisa y Kiwanis Action Club. Nan lo concentra nan esfuerso principalmente riba e area rond di Sonrisa, caminda nan a identifica cu tin necesidad pa mas limpiesa.

   Gobierno a gradici tur organizacion y boluntario cu a participa.