Parlamentario Setty Christiaans-Yarzagaray (MEP)
ORANJESTAD (AAN): Diabierna ultimo Parlamento tawata invita na e apertura oficial di ‘Operation Command Center’ situa na Savaneta. Na e ocasion aki Parlamentarionan y tur invitado presente por a haya un ‘rondleiding’ di e centro cu splicacion breve con esaki ta opera y ta hinca den otro.
Un proyecto sumamente innovativo y moderno cu mas tanto nos por wak den pelicula y cu ta un sistema cu paisnan grandi tin. E ta un proyecto unico y mas avansa den nos region di islanan Caribense. For di e centro aki ta atende yamadanan di alarma central, y ta monitorea diferente parti di nos isla cu un total di 258 camera y radar rond di Aruba.
Ta trata aki di un sistema di camera ubica na diferente parti di nos isla cu e meta pa eleva e siguridad tanto pa nos pueblo como pa nos bishitantenan. E sistema di cameranan aki ta basa riba ‘realtime intelligence’ cu momento cu tin un susedido, e cuerpo policial y di siguridad por recuri na e sistema aki pa resolve casonan.
Gradicimento ta bay na tur profesional y instancia involucra pa realisa e proyecto aki entre nan Setar, Cuerpo Policial y en especial Ministerio di Husticia y Asuntonan Social. Sigur tambe na Minister Rocco Tjon y Gabinete Wever-Croes cu e gran proyecto aki y logro!
