One Happy Island Lions Club ta cumpli 4 aña sirbiendo comunidad

ORANJESTAD (AAN): Cuatro aña pasa, riba 16 di juni, Aruba One Happy Island Lions Club a worde reconoci pa Oficina di Lions Club Internacional como un club di Lions.

   Tabata un soño di algun ex Miembro di Leo Club of Aruba di aña 90 cu e pasion pa sigui sirbi nos comunidad, cu a bini hunto cu e deseo pa funda un club di Lions nobo na Aruba. Despues di a cumpli cu e rekesitonan pa esaki a haya e aprobacion y asina e club a bira uno oficialmente reconoci.

   Bunita di esaki ta cu Aruba OHIL Club a worde funda durante festeho di e centenario di e organizacion di club di servicio mas grandi na mundo Lions Club Internacional.

   Como club hoben di apenas 4 aña di existencia e club a sobresali den su proyectonan na bienestar di nos comunidad manera e.o. varios “Beach clean-up” na Plastic Beach cual a worde adopta pa Aruba OHIL Club, e “Paranda pa nos Clasiconan” na cas di nos grandinan (SABA), “Campaña di Concientisacion pa Un Trafico Sigur”, “Sinterklaas pa nos personanan special” durante Paranda di Bochincha, “Proyecto conhunto cu Aruba Doet”.

   Tambe tin: Blood Donor Drive na Banco di Sanger, Proyecto pa Concientisa nos muchanan di scol riba e malesa di Diabetes, Actividad pa personanan special, Campaña Preventivo y Charla pa nos Comunidad tocante malesa di Diabetes, Ayudo na Fundacion Pa Nos Comunidad y Rode Kruis, Coleccion di Cuminda, Paña y Coy hunga pa famianan den necesidad, Campaña di Prevencion Contra Covid19, Actividad y Regalo pa Muchanan di menos recurso, Reciclahe di Monturanan di Bril pa esnan cu tin mester. Tur esakinan y mas ta danki tambe na e comunidad cu ta sostene e club cu por a logra un cantidad di proyecto pa esnan den necesidad. Y un proyecto cu e club ta trahando riba dje pa algun tempo caba ta crea mas oportunidad pa hobennan tambe sirbi nos comunidad y asina crea mas lidernan pa mayan.

   Ser un miembro di un Club di Leon, ta mas bien un forma di biba, caminda cu e miembro Leon ta semper atento pa e desaroyo den nos comunidad y ta cla pa yuda pa un mihor mayan, manera e dicho “Where there’s a need, there’s a Lion”, unda cu tin un necesidad, tin un miembro Leon cla pa yuda.

Aruba One Happy Island Lions Club ta orguyoso y contento pa forma parti di comunidad y ta gradici tur su miembronan y nan famia, oficina di Lions Club Internacional, Patrosinador Districto E-1 y Club Cabimas Costa Oriental, Clubnan ruman den Zona, Districto E-1 y 35N, e comunidad local, comerciante- local, prensa en general (radio, corant y television) y demas persona-, instancia- y organizacionnan manera e.o. Cuerpo Policial, FADA, Fundacion Zinnia, Rode Kruis, Aruba Reef Care Foundation, Bureau Rampenbestrijding, Aruba Doet, Fundacion Parke Arikok, MFA Santa Cruz y Paradera, Centro di Bario Playa Pabou, Señora Dientchie Hassel, Dr. Dellanire Maduro, Nos artista Internacional Jeon, Opticanan Local, Departamento di Cultura, Swingmasters, High Performance, Party Express y tur otro compania cu semper a coopera cu e club. Aruba OHIL Club ta sigui conta cu mesun cooperacion y sosten di un y tur.

   Ta danki na e contribucion y cooperacion di cada uno awe nos ta logra un aña mas di existencia cu exito y cu hopi animo y dedicacion nos lo sigui sirbi nos comunidad cu curason, pasion y amabilidad