ORANJESTAD (AAN): Lex de Jong, kende ta miembro di Raad van Bestuur di Respaldo a indica cu e partidonan den cuido a reuni hopi cu otro,
a papia y a discuti hopi y un di e conclusionnan ta cu bahamento di gasto di 60 miyon florin den un aña no ta sostenible.
“E tipo di bahamento di gasto aki ta destruyendo cuido na Aruba y nos a cuminza avisa Gobierno”.
Nos a bay Staten na Juli di 2020, pa splica cu tin alternativanan, segun de Jong.
El a sigui bisa cu ora cu e sectornan por traha hunto cu AZV y Gobierno, por logra un sistema financiero mas sostenible y di mihor calidad.
“Pesey nos a traha duro y mi ta orguyoso cu nos a logra cumpli cu e opdracht cu nos a haya, esta bin cu alternativanan di baha gasto”.
Ta hopi dificil y si nos sa cu tin un realidad den cual nos mester baha 60 miyon di gasto, e ora ey esey ta un realidad.
Na mes momento nos a bisa cu si na un manera stabil bo kier mantene e cuido, tin mester di tempo.
Esaki segun de Jong, kende a indica cu ta obvio cu cos por bay mihor cu locual ta bayendo awor.
El a bisa cu e intencion ta pa traha riba esaki, pero no ta sector di cuido ta hefe di e maneho, sino cu AZV y Gobierno ta partidonan hopi importante den esaki.
“For di comienzo tabata un placer pa traha hunto cu nan y ora cu e comision a wordo instala nos a pidi pa e dos partidonan aki participa activamente, pasobra ta ora cu bo traha hunto bo ta yega mas leu”.
Lamentablemente nos a constata cu cuido ta deteriorando, cu ta logico si bo baha asina tanto gasto.
Nos ta compronde pakico e bahamento di gasto ta necesario, pero nos ta spera cu via nos conseho na Gobierno y AZV tur cos lo mehora, segun de Jong.
El a sigui bisa cu Aruba tin bastante hende cu problema di salud, pues si bo organiza tur cos bon mes, mester percura pa mas hende bira y keda saludable.
