Advertencia di DIARIO a bira realidad durante fin di siman --- *Prijs di petroleo y mercadonan di balor sin rumbo fiho --- *Scarcedad di chip simbolo di crisis serio pa mundo moderno
ORANJESTAD (AAN) — Un situacion mundial serio a presenta su mes cu entrada di e variante nobo di Covid-19, cu ta Omicron.
DIARIO a prepara Aruba pa un salida di 2021 cu lo no tabata nada facil si tene cuenta cu desaroyonan cu a escala despues cu e cantidad di casonan di e variante nobo di Covid-19 tabata crece.
Fin di siman a conoce un scenario mundial cu DIARIO a sigui y a discuti cu expertonan cu ta mustra cu realmente mundo ta enfrenta uno di su crisisnan mas pisa den historia moderno, cu resultadonan sumamente alarmante.
E impacto di Omicron, manera e ultimo variante conoci di e Coronavirus nobo ta wordo yama, ta wordo sigui dor di henter mundo mientras paisnan a cuminsa cera nan porta den situacionnan serio cu a wordo provoca dor di e variante Delta na cantidad di pais y sigur na Europa.
Esaki ta nifica cu ainda e variante Delta ta ataca mientras Omicron a drenta. Si Omicron ta mas peligroso cu Delta of lo por reduci e intensidad di Delta, ta preguntanan cu ainda ciencia cu mester core tras di loke e virus ta haci, no por contesta.
Den mundo medico mundial alarma grandi ta wordo bati mientras medidanan ta wordo tuma.
Na mes momento e seguridad economico mundial a crash mientras mas y mas pais ta trata na adapta nan mes na e realidad nobo, cu ta haci pronostico sumamente dificil.
Dos indice di inseguridad mundial sigur ta e mercado di petroleo y e bolsanan di balor na mundo, cu a ta den estado di shock.
Prijs di petroleo a subi pa ayera bolbe baha teniendo cuenta cu lockdown na diferente pais, lo nifica menos biahamento y otro factornan cu ta yuda aumenta e demanda di petroleo.
Ta aumento di e demanda di petroleo despues di e restauracion di e ultimo ola di Covid-19, a haci cu OPEC a dicidi pa aumenta su prijs, cu atrobe a baha pero cu chens di bolbe subi.
Mercadonan di balor tambe a mira resultadonan di e problemanan cu ta afecta economia mundial.
E aumento di casonan debi na e variante Delta, ya a afecta produccion mundial y uno di e articulonan cu conoce un scarcedad ta chip.
Por bisa cu ta e chip tabata e yabi cu a habri e porta pa industrialisacion mundial, pa aviacion, pa auto moderno, pa aparatonan moderno cu awor por ta den problema serio.
Expertonan ta bisa DIARIO cu mundo ta enfrenta un crisis sumamente pisa debi na e hecho cu ta diferente elemento basico pa economia a uni.
Di e elementonan aki, prijs di petroleo y un inflacion enorme cu ta desaroya ainda, por wordo coregi dor di mundo.
Sinembargo, e virus cu ta motibo di Pandemia mundial, no por wordo controla manera a wordo spera.
E hecho cu hopi hende a nenga di vacuna, a yuda den e entrada di e variante nobo cu ta exigi awor pa medidanan.
Paisnan kier evita lo peor y sigur mas gasto den situacionnan financiero dificil cu a wordo crea dor di e prome variantenan di e Coronavirus nobo.
Hunto cu e ultimo ola di Delta, cu a sigui afecta e produccion economico mundial, Omicron ta di impacto enorme pa mundo.
DIARIO ta den contacto cu expertonan pa vigila e situacion actual cu ta causa basta confusion mundial debi na problemanan serio cu paisnan grandi tabata conoce y awor ta empeora.
Segun expertonan mester tene na consideracion cu Omicron por marca historia como crisis economico, financiero y social y lo exigi e mundo di “kleenex” cu a nace na Siglo 20, pa prepara pa un futuro nobo adapta.
Scarcedad manera di e chip, cu lo afecta tur cas na mundo di un forma of otro, ta indicativo pa e sentido di seguridad economico, financiero y mundial, cu e virus a basha abou.
