Mientras cu a registra 12 caso nobo riba diadomingo... *Variante 'omicron' plamando hopi lihe
ORANJESTAD (AAN): Riba diadomingo atardi, Departamento di Salud a indica cu segun resumen 23 persona a recupera y un total di 12 caso nobo di COVID-19 a keda registra di cual 2 ta no-residente.
E cifranan aki ta representa un 'Positivity rate' bou di e residentenan di 13%.
E cantidad di casonan activo di COVID-19 ta 172 y cantidad di fayecidonan relaciona cu COVID-19 ta 174.
Datonan ta ilustra casonan nobo di COVID cu un average semanal di 17 caso pa dia y un averahe di 'positivity rate' semanal di 11% pa dia.
Actualmente na Aruba tin 7 persona interna debi na COVID di cual den ICU tin 3 persona y riba piso general tin 4. Na Colombia tin actualmente 7 persona den ICU y 3 riba piso general.
Pa awetardi, Crisis Team hunto cu Gobierno lo duna un conferencia di prensa pa asina trece dilanti un noticia importante relaciona cu Covid-19.
Comunidad mester keda pendiente ya cu esaki lo por tin di haber cu e ultimo desaroyonan pa loke ta e variante nobo 'omicron', cual ta wordo califica door di Organisacion Mundial di Salud como un preocupante mirando cu e ta hopi contagioso, mescos cu a sosode cu Delta.
Tambe por a constata den weekend cu e variante aki ya caba a cuminsa placa den Europa y na Hulanda tin varios caso cu a keda registra door di personanan cu a yega di Zuid Africa.
Na Merca, Anthony Fauci no a descarta cu e variante tey presente caba den teritorio mericano. El a wordo raporta na Canada, unda riba diadomingo a confirma e prome dos casonan.
Pa loke ta Aruba, mester keda den estado alerta ya cu cualkier momento, e variante aki lo por aparece.
Varios pais manera Brasil, Merca y Colombia a anuncia restriccionnan, principalmente na e aeropuertonan pa evita e ingreso di personanan di algun di e paisnan africano, ya cu e variante nobo a wordo descubri siman pasa na e continente aki,
Na Europa, ta studiando e miles di casonan positivo cu e mutacion di 'omicron', pa locual algun di nan ta papiando caba di ciere di fronteranan.
Adhunto un grafico unda ta splica kico ta loke ta conoci te na e momentonan aki riba 'omicron'. Fuentenan: Bloomberg, Reuters, AFP, NYTimes, Straits Times Graphics.
