ORANJESTAD (AAN): E buque di guera hulandes 'Zr.Ms. Holland' lo drenta Aruba pa medio di un ceremonia cu ta tuma lugar awe dialuna, 29 di November pa 8:30 am.
Ta custumber cu un buke nobo di Marina Real den Caribe ta wordo ricibi cu un ceremonia cual ta cuminsa cu e prome saludo di arma.
Gobernador di Aruba, Su Excelencia Alfonso Boekhoudt, ta ricibi e barco di defensa desde e promontorio na e restaurant West Deck. E ceremonia ta cuminsa cu e prome saludo di Zr.Ms. Holland, den honor na Gobernador. E honor ta wordo corespondi cu saludo di armanan desde e oriya.
E teniente coronel di e Infanteria di Marina Art van Beekhuizen, comandante di Mariniers Kazerne na Savaneta, tambe lo ta presente den e recepcion.
No ta prome biaha e aña aki cu Zr.Ms. Holland ta yega waf di Oranjestad. E barco a haci'e den luna di Juli, pero debido na e vakantie di zomer, a dicidi pa no celebra un entrada ceremonial. Awor esaki si ta bay ta e caso.
Zr.Ms Holland ta trahando den e region for di Mei. E buque ta desplega pa actua den operacionnan anti-droga y di ayuda humanitario. Tambe ta wordo utiliza den tareanan diverso di guardacosta den e region di Caribe, como e localizacion di pesca ilegal, delitonan medioambiental y e operacionnan di buskeda y rescate.
Haci cumpli e orden huridico internacional ta un di e tareanan constitucional di e barco di Defensa.
E barco patruyero nobo ta un “Oceangoing Patrol Vessel”, pues barco patruyero pa lama grandi, di Klase Hulandes.
