ORANJESTAD(AAN): Ombudsman, mr. sra. Jurima Bryson ta trece e servicio di Bureau Ombudsman mas cerca di habitantenan di bario cu e campaña ‘Ombudsman den bario’.
Cu e campaña aki, Ombudsman kier brinda e oportunidad pa entrega keho pero tambe ta mas visibel y accesibel den barionan di Aruba.
Ombudsman cerca di e habitante
Door di ta presente na diferente bario, Ombudsman kier ta mas accesibel. Asina habitantenan di bario ta haña e oportunidad pa entrega keho y ta ricibi mas informacion tocante servicionan di Ombudsman.
Durante ‘Ombudsman den bario’, Ombudsman kier scucha e preguntanan di habitantenan y compronde mihor cua preocupacionnan tin den barionan. Contacto personal ta importante den esaki.
Tur ciudadano mester tin e posibilidad pa por ricibi informacion y conseho independiente ora nan tin un keho contra un instancia segun ley.
Informacion practico
Team di Bureau Ombudsman lo tey presente pa asina duna servicio pero tambe pa duna e oportunidad pa entrega keho.
Na unda por topa Ombudsman?
Bureau Ombudsman lo ta presente na e siguiente luganan:
MFA Paradera – 13 di augustus 2026, 8 am – 12 pm
MFA Savaneta – 20 di augustus 2026, 8 am – 12 pm
MFA Noord – 27 di augustus 2026, 8 am – 12 pm
MFA Santa Cruz – 3 di september 2026, 8 am – 12 pm
AEDA San Nicolas – 10 di september 2026, 8 am – 12 pm
Si en caso ta desea di entrega un keho, mester trece tur documento relevante.
Ombudsman ta keda enfoka riba un servicio visibel y accesibel
Bureau Ombudsman ta sigui inverti den contacto personal cu ciudadanonan. Door di ta presente den bario y papia cu habitantenan, Ombudsman kier contribui na crea mas confianza entre comunidad y e instancianan.
Mas informacion tocante ‘Ombudsman den bario’ y e posibilidad pa traha un cita ta disponibel via canalnan social di Ombudsman.
