Frances Rugebregt di IVA:
- Ta hopi importante manda e keho pa dunado di cuido na prome lugar
ORANJESTAD (AAN) -- Den entrevista cu Frances Rugebregt, funcionario di Inspeccion di Salud (IVA) na Departamento di Salud Publico, a toca e tema specifico di kehonan riba cuido medico, y con pa haci esaki.
Rugebregth a menciona cu na momento cu un ciudadano no ta contento cu e cuido medico cu ta wordo duna, ta aconsehable pa entrega un keho. “E idea ta pa entrega e keho na e dunador di cuido mes, sea un docter di cas, botica, etc. E ta importante pa haci esaki pasobra e ta un feed back pa nan riba kico nan mester mehora. Pero, eigenlijk nos ta cubri’e tambe pa hopi hende, vooral den comunidad di Aruba e ta hopi dificil pa haci esaki, y p’esey tambe nos tey como un sosten”, Frances Rugebregt a señala.
El a reitera cu semper por yama Inspectie, tambe via website por entrega un keho digital, of manda un email na This email address is being protected from spambots. You need JavaScript enabled to view it., pero tambe ta hopi importante pa mand’e na e dunado di cuido mes.
T’asina cu hopi hende tin temor di duna keho riba mal practica, pasobra nan por haya represalia un siguiente biaha cu mester di e dunador di cuido.
“E ta keda algo delicado, nos tin hopi hende enberdad cu tin miedo cu si nan entrega un keho esey kiermen cu e dunador di cuido lo no gusta esaki, pero ta keda importante tambe ta pensa cu no tur dunador di cuido ta tuma esaki como algo malo tampoco. Hopi di nan no sa mes, no ta conciente, pasobra nos tur ta keda hende y foutnan tambe por pasa. Y ta depende kico e persona mes kier pa yega na un solucion hunto”, Frances Rugebregt a comenta.
El a agrega cu e idea no ta pa e dunador di cuido haci algo malo tampoco. Tambe tin cierto casonan mas severo unda e cuidador di cuido mes ta meld na Inspectie cu algo a bay robes. E casonan cu ta duna boet ta ora dunadornan di cuido no mag di practica na Aruba, pasobra ta importante pa nan ta inscribi na AruBIG y den casonan cu no ta inscribi e ora ey IVA ta duna boet.
“E pashent so & so tin su derecho y si nan ta sinti cu no a bay bon, por ehemplo si nota sinti bon ora tuma su remedi, of no ta contento cu un operacion, esey ta cay den e parti di keho tambe. Den casonan di remedi si e persona no ta sinti su mes o.k ta importante pa bay bek na su docter di cas, of su botica pa e splica esaki tambe y asina por yega na un solucion hunto”, el a reitera.
Frances a reitera cu tur pashent tin su derecho y tambe ta importante pa tur pashent tuma su propio responsabilidad, percura pa e ta bon informa, bon educa, y haci hopi pregunta.
Na IVA no ta drenta hopi keho, pero si e ta ripara cu hopi hende ta keha via facebook, locual no ta trece ningun solucion. Ora un keho ta drenta IVA nan ta filtra esaki, y ta trata esaki.
