Hopi preocupacion local y internacional pa cambio politico na Aruba
*Temor grandi pa cartera di Finanzas of Economia cay den man di Mike
*Aruba ainda mester paga un parti grandi di e debe cu Mike a crea
ORANJESTAD (AAN) —Cada dia cu pasa sin informacion cu un Gobierno pa Aruba a bira realidad, ta un preocupacion grandi den circulonan conoci cu e realidad cu e proximo gobernacion cu tin Mike Eman como uno di su formadornan, por percura pa sorpresa pero tambe resultado sumamente serio pa e pais.
Informantenan clave ta bisa DIARIO, cu e Gobierno nobo cu lo haya rienda di Aruba den su man, no solamente mester mira con nan ta atende cu problemanan mundial cu ta sigui crece.
Preocupacion grandi pa loke e futuro politico imediato por trece na Aruba, ta basa riba e hecho cu un mayoria sumamente limita cu Mike Eman a logra durante eleccion 2024, a pone futuro di Aruba atrobe den e mannan di Mike Eman cu a percura pa e problemanan financiero cu resultadonan social na Aruba.
E solo hecho cu Mike Eman ya prome cu eleccion a entrega prueba cu su acercamento politico no a cambia y cu el a entrega pensionadonan e speransa falso di aumento increibel di Pensioen di Behez, ta pa fuentenan importante di DIARIO motibo pa preocupacion creciente.
Speransa di un grupo grandi den comunidad tabata cu partido Futuro lo a sa di atende cu Mike Eman y para ariba loke partido Futuro a presenta como cambio grandi na fabor di comunidad di Aruba.
Te awor e persona cu ta profila su pensamentonan ta Mike Eman, cu ya for di eleccion a crea e espectativa cu sigur personanan cu ta ricibi pensioen di behez lo por conoce un aumento enorme di entrada.
Informantenan a splica DIARIO cu e problema serio ta, cu Mike Eman a crea cerca Pueblo di Aruba e impresion cu e problema financiero ta di otro persona y cu e lo bolbe uza su magia pa cambia e situacion.
E hecho cu Mike Eman mes a papia di e forma cu resultado di e recuperacion no por a alcansa tur hende ainda ta mustra bon cla cu tabata tin un estorbo y e tin razon.
Uno di e preocupacionnan grandi na Aruba ta, cu e maneho di Economia of di Asuntonan Financiero por cay den man di AVP y asina habri caminda pa mas debe wordo crea pa Pueblo di Aruba, cu ainda ta paga pa tram y tur fantasia di e prome gobernacionnan di Mike Eman.
Loke a causa hopi lamento den Pueblo ta, cu atrobe durante eleccion 2024 Mike Eman a bolbe crea speransa falso cu su wega di aumenta pensioen di behez cu ta prueba cu nada a cambia pa loke ta trata e politica barata di Mike Eman, cu a bira un peso costoso pa Pueblo pagador di belasting na Aruba.
Mientras pues tin temor cu Asuntonan Economico di Aruba y Asuntonan Financiero por cay den man di Mike Eman, cu atrobe lo tin oportunidad pa zink Aruba directamente, Pueblo di Aruba ta ansioso pa ricibi resultado di e combersacionnan pero tambe e exigencianan di Futuro pa evita cu Mike Eman ta hinca Aruba atrobe den un aventura cu lo aumenta e peso di belasting cu Pueblo ta paga a base di tur e debenan bieu di Mike Eman.
E resultado di eleccion a indica claramente cu Pueblo di Aruba kier un aire fresco y esaki a haci cu Wendrick Cicilia cu como number uno semper lo mester a fungi como lider di e partido, mescos cu Gerlien a ricibi cantidad di voto.
A wordo mustra cu Mike Eman mester tene su mes na e resultado aki y tanto AVP como Futuro mester cera porta pa Mike Eman atrobe causa problema pa Aruba.
Enfasis pues ta pa e carteranan di Economia y Asuntonan Financiero no ta den man di Mike Eman, cu sin participacion di Wendrick Cecilia awe lo no tabata encarga cu formacion di e gobierno nobo di Aruba.
