Olivia Benschop Erasmus ta bay presenta su fantasia di placa riba tela

Dia Internacional di Poesia:

ORANJESTAD (AAN): Diaranzon awor ta bay celebra Dia Internacional di Poesia cu un bunita actividad na Biblioteca Nacional den George Madurostraat.

Ta bay tin expresion di poesia, baile, canto y mas y un di e personanan cu ta bay duna un presentacion durante e actividad cu ta bay ta di 6:30 pm pa 9:30 pm, ta Olivia Benschop Erasmus.

Durante un conferencia di prensa Dialuna mainta Erasmus Benschop a splica con el a dicidi di participa na e evento.

“Pa casualidad mi a topa Mirto Laclé na un entiero y mi a bise cu mi tabata tin planea pa haci un exposicion di un proyecto cu mi a traha 1 aña largo riba dje durante e pandemia”.

E pandemia a trece hopi cambio den nos manera di pensa y apesar cu hopi hende a wak e pandemia como algo hopi negativo, e tin su parti positivo.

Esey ta e parti cu ami a purba di saca afo, segun Benschop Erasmus, kende a indica cu como cu e no ta un persona cu ta wak hopi television e gusta crea cu su mannan.

Di un anochi pa mainta el a haya un inspiracion pa traha un serie nobo di placa di papel, manera cu a wordo haci na 2019 via diseñonan di Nigel Matthew.

“Tabata mi deseo na un forma di fantasia crea algo bunita di su trabao, pero na mi manera riba tela”.

Esaki mirando cu mi ta maestra di traha riba ‘textiel’ (tela), cu ta locual mi a studia na Hulanda.

Mi a traha tur e diseñonan di nos placa riba tela, na un manera di fantasia y color, segun Benschop Erasmus.

El a sigui bisa cu locual cu el a traha riba tela lo wordo devela Diaranzon.

Segun Benschop Erasmus, ta interesante pa wak e diferente diseño y colornan riba nos placa di papel y pensa riba su nificacion.