ORANJESTAD (AAN) – Prome Minister mr. Evelyn Wever-Croes elabora tocante e tema di Covid-19, den conferencia di prensa di Dialuna 21 di Maart.
E mandatario a indica cu, manera ta conoci, desde inicio di e luna en curso, gobierno a informa cu nan lo ta publicando e cifranan di covid-19, solamente un bez pa siman.
Diabierna ultimo gobierno a haya e cifranan di mas reciente, unda por mira cu tin 40 caso activo, locual ta un cifra hopi positivo. E siman prome tabata 62 y e siman aki ta 40, y esaki ta algo cu ta yena Aruba di e trankilidad cu tin mester. Tambe a constata cu no tin ningun persona den cuido intensivo na Hospital, na e momentonan aki, no obstante tin 4 den UCI na Colombia, y e mandatario ta desea pa nan recupera pronto, pa nan por bin Aruba back.
“E cifranan aki ta mustra cu nos ta riba bon caminda, y ta confirma cu nos maneho tabata efectivo, cu nos decisionnan tabata na tempo, prudente y responsable”, Prome Minister a señala. El a gradici un bez mas na tur esnan cu ta asisti gobierno den temponan di Covid-19. E dignatario a subraya cu e ta un crisis ainda, pero gobierno ta evaluando aworaki pa de-scale sinembargo lo keda monitorea loke ta sosodiendo.
“Ta hopi importante pa nos tur sigui cuida, pa aworaki, dos aña den esaki mi ta kere ya tur hende sa kico mester haci y kico no. Mi no ta kere cu nos tin cu sigui ripiti, pero talvez poco, poco, den futuro si. Nos mester sigui cuida y sigui vacuna. E siman aki, Diaranzon, nos unidad movil lo ta den Centro di Bario Lago Heights pa esnan den vecindario por tuma nan vacuna. Bo por vacuna tambe, diariamente, na DVG na Playa”, Prome Minister a menciona.
E dignatario a subraya cu ningun hende por garantiza cu lo no bin un otro variante den futuro, of cu nos ta bay mira otro ola. Ningun hende por garantiza esey. “Un cos si mi por garantiza; cu Aruba ta miho prepara aworaki pa cualkier cos cu mester bin ainda. Pero pa esaki nos mester di bo tambe, pa bo cuida y pa bo sigui vacuna, pasobra covid-19 tey; e cantidadnan ta abao pero e tey ketobay”, Prome Minister a recalca.
“Pero atrobe mi ta pidi ban sigui cuida. Cuida bo mes, pasobra bo ta stima bo mes, bo ta stima bo famia y bo ta stima Aruba. Aruba ta conta cu bo aworaki!” Minister Presidente a bisa pa conclui e tema di covid-19.
