Old Skool Bikers cu donacion di 45 mil na Women’s Club pa proyecto ‘Dress a Child’

ORANJESTAD (AAN): E comunidad di fanaticonan di motorcycle ‘Old Skool Bikers Aruba’,

a haci recien un donacion di 45.000 Florin na Women’s Club of Aruba, pa nan proyecto di ‘Dress a Child’.  E donacion lo bay sostene e mision di nan pa suministra paña nobo pa muchanan den necesidad rond di Aruba, sigurando cu nan tin e recurso- y confianza pa sobresali.

   ‘Dress a Child’ ta un di e numeroso proyecto di Women’s Club of Aruba, cu ta dirigi su mes pa suministra muchanan cu bon paña, apoyando nan asina pa bay scol y participa den actividadnan di comunidad na final di aña.  Cu e donacion di Old Skool Bikers Aruba, e proyecto lo bay logra yuda aun mas mucha directamente mehorando nan calidad di bida.

   E entrega di e donacion a tuma lugar na Club House di Old Skool Bikers Club na Ponton.  Aki president di Women’s Club, esta Reina Geerman a ricibi e donacion.  “Nos ta hopi agradeci pa Old Skool Bikers pa nan tremendo sosten,” Reina Geerman a bisa.  “Nan donacion ta proba e poder di comunidad y e balor comparti di bondad y generosidad.  E contribucion aki lo haci un impacto significante, sigurando cu hopi mucha na Aruba lo bay tin acceso na paña pa nan sinti nan mes sigur y exitoso.”

   Oscar Britten, kende ta tesorero di Old Skool Bikers Aruba, a splica cu nan ta orguyoso di forma parti di un iniciativa asina significante.  “Esaki ta djis un forma cu nos por contribui pa e bienestar di comunidad, y nos ta spera cu nos donacion lo inspira otronan pa envolvi nan mes y yuda haci un diferencia.”