Hunto cu IBiSA y Patrishi Sports
ORANJESTAD (AAN): Manera tin ta haci algun aña caba cu gran acogida y bon energia, Comite Olimpico Arubano hunto cu parnertnan IBiSA y Patrishi Sports a inicia e preparacionnan pa asina unabes mas organisa e “IBiSA Kids Run & Olympic Day Celebration ”.
Esaki ta un evento cu ta wordo organisa riba e fecha cu ta celebra mundialmente e “Olympic Day” cu ta 23 di juni. Como dia 23 ta cay riba un dialuna, e evento lo tuma luga e diasabra prome, pues dia 21 di juni.
Durante e evento aki, lo haci un careda pa mucha, unda nan lo por core diferente distancia dependiendo na edad. Banda di esaki, lo tin un festival deportivo, unda varios federacion deportivo lo prepara actividadnan y lo splica mas tocante nan deporte.
Claramente lo tin bon ambiente musical y animacion pa asina crea un evento divertido pa un y tur. E evento lo tuma luga riba Vondellaan, cumisando dilanti di edificio di Comite Olimpico Arubano.
