ORANJESTAD (AAN): Un Ola Tropical cu ta cubriendo un area basta grandi, cu tabata ayera yegando e islanan mas pariba di Caribe y
cu marduga a drenta Lama Caribe, lo ta acercando e area di Aruba awe.
Movimento di e Ola Tropical aki ta direccion west, y e ta moviendo entre 28 y 37 km/h. Imagen di satelite y radar di Barbados, a indica cu tabatin awacero plama den varios sector di e Ola Tropical aki, y mayoria di nan ainda ta isola. Pues no ta mira ningun señal cu e maltempo aki ta cuminza organiza su mes.
Pues awe por mira na Aruba cielo basta nubla, y por tin awacero paki-paya, cu por ta localmente fuerte. E lo yobe sea varios caminda, of riba lama rond di Aruba.
