Minister Geoffrey Wever orguyoso:
- Hopi permiso duna pa actividad di Real Estate
- Dunamento di permiso awor ta mas rapido y eficiente
ORANJESTAD (AAN): Pa habri un negoshi of haci cambio den e permiso pa negoshi segun ley, mester haci un peticion pa permiso di negoshi via e website di Departamento di Asuntonan Economico, Comercio y Industria (DEACI) y ta worde otorga bow di responsabilidad di Minister di Asunto Economico.
Den e periodo di April te cu Juni 2025 a ricibi 634 diferente tipo di peticion. Di e 634 peticion ricibi, 245 peticion a worde trata y e permiso relevante otorga, 234 peticion ta den tramite, 155 peticion no por a worde trata pa falta di documento y of pago.
Di e 634 peticion ricibi y e permiso relevante otorga, 201 ta peticion pa permiso nobo den e periodo di mei te cu juni 2025. Di e 201 permiso di negoshi nobo otorga, 27 tabata pa e eenmanszaak, 30 pa filiaal, 139 pa VBA, 3 pa NV y 2 pa un vennoot di un VOF. E tipo di actividad comercial pa cual mas permiso nobo a worde otorga ta actividadnan di Real Estate, houdstermaaschappij, compania di construction, restaurant y otro tipo di local pa come , kapsalon y salon di beyesa. Pa e prome 6 lunanan di 2025 un total di 402 permiso pa negoshi nobo a worde duna.
Desde cu Minister Geoffrey Wever a introduci e vestigingsbeleid nobo oktober 2022 a zorg pa acelera e proceso di otorgacion di permiso door di elimina diferente rekisito, digitalisa henterl e sistema di peticion pa permiso y stimula diferente sectornan economico, inversion den centro di Oranjestad y San Nicolas etc. Meta di e vestigingsbeleid nobo ta tambe pa emiti permiso den un periodo di dos siman.
Minister Geoffrey Wever ta gradici DEACI pa percura cu e permisonan pa negoshi worde emiti na forma eficiente y liher y tambe pa compila na un forma continuo tur informacion riba e proceso di permiso pa negoshi.
Tur informacion riba e proceso pa permiso di negoshi ta disponibel riba e website www.deaci.aw
