Ohala na Aruba tur cas y edificionan grandi lo tabata tin un sistema pa colecta awa di yobida

Nathalie Maduro, directora di Santa Rosa:

ORANJESTAD (AAN) – Den cuadro di Dia Internacional di Awa, Diaranzon 22 di Maart, DIARIO a entrevista señora Nathalie Maduro, Directora di Departamento di Agricultura, Cria y Pesca (LVV), yama popularmente Santa Rosa.

            Nathalie Maduro a expresa cu “Awa ta bida, manera semper ta wordo bisa, y mester di awa pa produci practicamente tur loke nos ta come”.

            “Un dia manera awe, ta un dia pa nos tur reflexiona. Nos tabata tin e suerte cu nos a haya basta yobida, y cu e damnan toch tin basta awa ainda, pero pa bo por mantene un awa den bon condicion, bo no por tira sushi den dje, no mester malusa e awa, y mesun cos cu nos posnan di awa dushi. Nos ta hopi limita cu awa subteraneo y pesey nos ta pidi semper no abusa, ora ta busca awa den e posnan aki. No uz'e pa metanan cu ta contrario na agricultura y crianza di bestia”, Maduro a acentua.

            Nathalie a referi tambe na e coleccion di awa. El a señala cu ora awa ta yobe hopi biaha ta bira un problema, y e ta imagina con e lo tabata  si tur cas y edificionan grandi na Aruba tabata tin nan 'goot', Santa Rosa ta un ehemplo, cu a percura pa pone goot y tankinan, y nan mes ta haci uzo di e awa ey pa muha nan matanan.

            “Un di e peticionnan cu nos tabata tin den pasado, y cu kizas ta algo cu no ta cay bao di nos responsabilidad, pero si nos a acerca DOW, por ehemplo, pa wak ki posibilidad lo tin pa crea un maneho na momento cu un compania tin un proyecto grandi tin un sistema di 'goot'. Pero no solamente un 'goot', mester tin un tanki tambe pa por conecta e awa. Pasobra tin biaha bo ta wak  hopi edificio grandi cu nan tin full e sistema di 'goot', pero ora tin awacero hopi biaha e awa ta bay riba nan parkinglot of gewoon ta bay perdi”, directora di Santa Rosa a comenta.

            E dama a agrega cu esaki ta lamentable, pasobra colectando e awa di yobida mas tanto posibel, y uzando esaki na un forma responsabel, cu timer pa no malgast’e, e lo ta un ayudo grandi pa esnan cu ta planta.

            “Esey ta algo cu awe, riba Dia Internacional di Awa, mi ta kere nos por realiza cu Aruba ta un isla hopi seco, pero toch por wak cu ora tin yobida si nos haci bon uzo pa colecta e awa e lo por tin su beneficionan na largo plazo”, Nathalie Maduro a señala.