Nan ta raportando esaki como abuso
ORANJESTAD (AAN): E ta algo cu hopi trahador di horeca na Aruba sa di dje pa hopi tempo! Esta cu esnan cu ta biba na San Nicolas y cu tin di bay labora na Highrise Hotel, ta haci uso di bus y masha hopi biaha nan ta yega laat trabao.
Ni maske con trempan nan bay para pa warda Bus pa asina sali rumbo pa Palm Beach pa bay traha... toch Bus ta topa cu trafico pisa y na final e trahadornan ta yega laat.
Tin biaha ta yega sea 10 minuut, of tambe tin biaha 15 minuut laat.
Na un Highrise Hotel nan tin un hoben laborando den cushina, y e ta un persona hopi dinamico, y demas coleganan ta admira e trabao cu e ta haciendo. E ta persona cu ta cumpli cu tur ordo, e ta capta rapido tur loke nan siñe, y e ta mustra di ta stima su trabao.
Unico problema ta, cu e ta bin traha cu Bus. Y debi cu Bus ta yega laat, e tambe ta yega laat na su lugar di trabao na e Highrise Hotel.
Y recien algo sorprendente a socede ora el a yega laat. Su hefe directo kende ta un Colombiano, a djis bise cu el a yega laat, y e tin di djis bay cas! Bay cas! Si acaso nan mester di help, e ora numa nan lo yame.
E hoben a keda hopi desanima cu e decision di su hefe Colombiano, pero a bay cas. Ate awor ya caba varios dia na cas, y nan no ta yamand’e bek.
Y su coleganan den Cushina ta hayando hopi falta di dje. Nan ta sinti nan mes como un team ‘manca’, y cu falta di un trahador mas pa yuda nan keep up cu e fluho mainta, specialmente ora di breakfast. Pero ni asina, e hefe Colombiano ta demostrando su ego, y no ta yamando e hoben mas pa bin traha.
E trahadornan den cushina aworaki ta basta disgusta, y algun ta hasta opina cu Departamento di Labor, como tambe Ministro di Labor tin di haya sa ki clase di abuso ta ser cometi na e Highrise Hotel aki. Un medida asina absurdo contra net un trahador super balente y cla semper pa yuda tur ora cu por.
Y debi cu Bus ta yega laat... el a yega laat y awor ate na cas riba ordo di un hefe Colombiano. E trahadornan ta disgusta cu esaki, con un stranhero ta bully y pusha un hende local abao di e forma ey.
“E hefe Colombiano di nos a demostra caba cu e no tin ningun clase di respet pa nos clase trahador na Aruba,” nan a splica recien. Y pesey nan ta preparando pa bay escala esaki. E hefe Colombiano kizas pronto lo bay haya sa cu bo no por haci cos di abuso aki contra net un yiu di tera asina trahador, y cu pa via di algo cu no ta su culpa, cu Bus a yega laat y ate awor na cas sin cu tin chens di traha.
