Ohala gobierno cuminza pronto cu su proyecto pa cual edificio di ex-DOW lo wordo destina

ORANJESTAD (AAN) – E antiguo edificio di DOW ta birando cada dia mas deteriora paden y pafo, y sin duda ta un bista mahos den pleno curazon di ciudad,

ademas cu den oranan di anochi tin personanan cu no tin lugar pa keda, cu ta haci uso di e lugar y ta tine sushi y cu un holo stinki cu ta wordo sinti for di su entrada te su parti patras.

Turistanan cu ta pasa ey dilanti, specialmente di crusero cu ta djis cruza caminda pa yega e parada grandi di Arubus, ora nan ta bay bishita e area di hotel y su beachnan, ta haci comentario, ya cu no ta solamente un neishi di paloma cu ta laga sushi riba bentana y unda cu nan ta acomoda, pero riba acera tambe. (Incluso tin turistanan cu ta saca potret di e propiedad di gobierno aki).

Segun un par di hende cu tin negoshi ubica den e area aki,  tin adictonan ambulante cu a kibra un par di bentana pa drenta drumi paden di e edificio, y na entrada mes por mira un cantidad di sushi acumula, cu ta un bista masha bergonzoso pa un isla cu ta hospeda tantisimo turista.

Varios siman atras, Minister di Turismo Dangui Oduber, y funcionarionan di APA y ATA, a anuncia cu e ex-edificio di DOW aki lo bay bira e sede di APA y un oficina informativo di ATA tambe lo bin eynan.

Ainda, obviamente, e proyecto ta den perspectiva, pasobra ta trata di un trabao grandi den un edificio monumental, cu lamentablemente a bay atras completamente, pero ohala por mira pronto algo cu por mustra cu e lo cuminza, maske cu e lo por tarda pa keda cla. Hunto cu e articulo aki, un par di potret di e situacion cu ta merma full e calidad di e edificio, y e cantidad di sushi cu ta spera instancianan concerni, por pasa haci limpi e parti aki.