Den su siguiente reunion
ORANJESTAD (AAN) – Minister di Medio Ambiente, Ursell Arends, a duna di conoce den un entrevista cu DIARIO, cu durante su proximo reunion, Conseho di Minister ta bay instala un 'task force', cu lo bay controla e sistemanan, pa sa cual ta e companianan cu ainda no tin un 'grease trap' y ta manda vet den e sistema di riool y paraliza esaki causando daño, cu tur su consecuencianan.
E minister a agrega cu e sa cu esaki ta crea panico den e sector hotelero, den e area di Palm Beach, pasobra cada biaha cu e ta “over flow” e ta afecta e turistanan y tambe e trafico den e area.
E dignatario a señala cu esaki tin e atencion di gobierno, y Conseho di Minister lo aproba y instala un task force, cu lo bay controla. El a agrega cu ya caba e sector hotelero a wordo poni na haltura tambe cu esaki ta bay bin, y e ta spera cu ora tur departamentonan uni y cuminza traha riba e problema tambe, por trece regla y orden tambe, pa loke ta trata cumplimento cu ley, pasobra e ‘grease trap' ya caba ta parti di e ley, pero lamentablemente no tur establecimento tin’e.
No obstante, un bez cu reinforza esaki e sistema lo traha optimalmente. Pero esaki no ta kita afo e Ley di RWZI cu ta den su etapa final, dentro di poco cuminza cana e proceso formal, lo bay DWJZ y Raad van Advies, y despues e ta premira cu prome cu e fin di aña aki e lo wordo trata den Parlamento, y un bez cu e wordo aproba, e financiamento pa RWZI nobo tambe lo wordo regla.
Arends a bisa cu esaki lo tarda un poco, pero e ta kere cu e pasonan cu gobierno ta tumando pa minimiza e bog cu ta drenta den e sistema tambe lo yuda pa RWZI traha optimalmente.
