Nicole Hoevertsz:
*Atletanan preparando pa representa Aruba na 4 evento internacional
ORANJESTAD(AAN): Comité Olimpico Arubano (COA) ta hopi agradecido pa e confianza di Aruba Tourism Authority, cu un biaha mas a firma un acuerdo cu nan.
Vice presidente di e Comité Olimpico Internacional y Secretario General di COA Nicole Hoevertsz durante un conferencia di prensa a sigui bisa cu e aña aki enberdad ta bay ta un aña interesante, pasobra nos atletanan ta bay viaha regularmente pa representa Aruba na weganan internacional.
“E aña aki tin 4 evento internacional riba programa, esta e weganan Suramericano de Playa na Santa Marta, weganan Centroamericano del Caribe na San Salvador, ta bay tin e World Beach Games na Indonesia y nos atletanan ta bay participa tambe na e weganan Panamericano na Santiago de Chile”, segun Hoevertsz.
El a splica cu mundo di deporte ta compronde e acto special di representa bo pais y bo bandera y sigur ora cu nan tin exito y e himno di Aruba wordo toca.
“Pesey mes di berdad nos ta embahadornan di pais Aruba y e aña aki atrobe boso lo mira hopi di nos embahadornan representa nos pais orguyosamente”.
Naturalmente nos kier anticipa otro aña, ora cu ta bay tin e Weganan Olimpico na Paris, caminda cu un biaha mas un cantidad di mas cu 3 biyon hende lo wak Aruba cana den e ceremonia di desfile di e weganan, segun Hoevertsz kende a bisa cu ATA y COA ta traha pa otro.
