En ocasion di a celebra Dia Mundial di Trahado Social
ORANJESTAD (AAN) — Diamars 21 di Maart aki, a keda celebra e Dia di Trahador Social, y den e contexto aki DIARIO a entrevista señora Tarsis Sierra, director Interino di Departamento di Asunto Social (DAS).
Tarsis Sierra a expresa su gratitud pa tur trahado social y tur persona cu di forma direct of indirecto ta traha den e ramo social.
“Awe ta e Dia Mundial di Trahado Social y pa nos como Sociale Zaken, cu ta duna e servicio social, e dia aki ta hopi importante. Rond di mundo completo, nos tur ta uni pa celebra e dia aki” el a expresa.
Tarsis Sierra a bisa y a reitera, cu DAS ta un departamento hopi diversifica y, logicamente, nan ta duna e servicio na personanan di Aruba cu tin problema social, y nan ta hopi contento di tur e trabaonan cu nan ta haci, pasobra nan ta yuda esnan di menos recurso y esnan cu tin hopi problema social den pueblo.
“No solamente e Trahador Social cu tin e titulo aki, pero cada un di nos cu ta traha den Sociale Zaken, nos kier gradici hopi di nos curazon, pasobra tin e Departamento di Bida y Famia, e Psicologonan, cu tur e retonan cu nos tin akinan den nos pais Aruba awendia; e problema di salud mental nan ta bin cerca nos. E Departamento aki semper ta yen. Nos ta yuda tur persona cu ta wordo referi na nos departamento di Bida y Famia, pa nos psicologonan. Nos ta atende cu problemanan di pareha, di famia cu yiu cu ta wordo kita of no ta wordo kita, e divorcionan cu tin tur dia. E retonan aki no ta caba, logicamente nos tin rekisitonan. E personanan cu no tin e modo di bay un abogado eyfo, nan ta bin akinan y nos ta yuda e personanan aki tambe pa nan haya un abogado liber”, señora Sierra a remarca.
El a referi na e Departamento di Bijstand, cu ta conoci pa mayoria di hende. “Hopi hende no sa cu nos Sociale Zaken ta hopi diversifica. Nan ta pensa cu solamente nos ta duna bijstand. No. Esey no ta e caso, nos tin e departamento di bijstand tambe. Esaki ta pa e personanan cu no tin un trabao of a perde trabao temporalmente, y nos ta yuda nan pa e temporada ey por pasa, prome cu nan haya un trabao”.
Sierra a señala cu e seccion aki tambe ta yuda personanan cu tin limitacion y no por traha, y cu ta di menos recurso. “Manera cu mi a bisa, e dia aki ta hopi importante pa nos, nos ta celebre, nos ta honra tur nos trahadornan for di e persona cu ta atende telefon pa DAS, esun cu ta haci limpi pa nos, pasobra nan ta traha pa e departamento aki, y conhuntamente nos ta forma Sociale Zaken. Y mi ta bisa di curazon, pabien na tur e trahadornan di DAS, pero mi no kier descarta y cera sin bisa tambe, cu no ta solamente nos como Sociale Zaken, pero tur e otro trahadornan eyfo, di fundacionnan y otro departamentonan cu ta duna servicionan asina importante, direct y indirectamente den e parti social, manera KPA, tur e trahadornan di scolnan, tur nos stakeholders, instancianan y partners cu ta traha cu nos y asina mi por keda menciona. Asina importante e ta. Cada un di nos cu ta aporta na algo chikito pa yuda un persona, ya caba por bisa ‘bo ta yudando un persona di menos recurso’ y mas vulnerable”, señora Sierra a señala.
