Rapport no ta mustra ningun cambio pa loke ta rescate di idioma Papiamento
*Aruba ta bay keda cu problema di 'seudo siñamento'
ORANJESTAD (AAN): Den e ultimo rapport cu Departamento di Enseñansa a publica tocante maneho di idioma, Dr. Joyce Pereira, di Fundacion Lanta Papiamento, a duna su punto di bista riba esaki y e no ta mucho contento cu ne.
El a splica cu den e rapport aki ta bisa cu enseñansa nobo pa loke ta scol basico, papiamento ta e idioma di alfabetisacion y e otro idiomanan ta keda materia. Papiamento ta cuminsa cu 70% di tur e materianan na papiamento (como idioma di instruccion) y 30% di hulandes. Asina e porcentahe ta keda baha te yega na klas 6 unda hulandes ta bira 70% y papiamento 30% so.
Ora di puntra dicon y e meta ta cu asina e mucha ta siña hulandes pa e por sigui scol secundario. Kiermen, no tin ningun cambio, Pereira a remarca.
Esaki ta un peliger cu mester bay ataca, pasobra no tin manera pa midi e cambio.
Su conclusion ta cu e realidad ta cu si no ta innova y no duna papiamento e lugar cu e merece Aruba ta bay keda cu problema manera e 'seudo siñamento', siñamento di gaña gaña, siñamento for di cabez pa haya un voldoende y despues ta lubida toch, a expresa.
Segun e experto, tur esaki ta bay tin como resultado e analfabetismo funcional, hopi frustracion y no ta yega nunca na e metanan di desaroyo sostenibel.
Joyce Pereira a expresa cu no mester ta pesimista y keda positivo. Mester bringa. No mester laga politica so dicidi. Si nos por tin un minister cu ta bisa no, papiamento no pasobra Hulanda ta exigi kico, Hulanda ta exigi cua, nos tin cu mustra e minister ey of ken cu e ta cu Hulanda tin nada di bisa nos".
A agrega cu for di aña 1954, Aruba ta autonomo pa loke ta enseñansa. Hulanda no por bin bisa Aruba nada. A sigui bisa cu mester ta un tiki fuerte, no tene miedo, studia e situacion y bin c'un prueba pa convence nos hendenan.
"Un punto hopi importante ta cu e mayornan tambe mester haya sa kico ta sosodiendo. Mayornan no ta envolvi. Mayornan mester ta envolvi den henter e proceso di enseñansa, pero bo n' ta tende e mayornan, bo n' ta tende e maestronan. Ta dos grupo hopi importante den e totalidad di enseñansa cu bo n' ta tende protesta contra e situacion cu ta inhusto", Joyce Pereira a finalisa bisando.
