ORANJESTAD (AAN) – Parlamentario di fraccion di MEP, Setty Christiaans-Yarzagaray, a elabora den conferencia di prensa di diaranzon 9 di Februari awo,
tocante e tema di turismo, en conexion cu un bishita informativo di ATA na Parlamento.
Yarzagaray a menciona cu Diamars di e siman aki, nan a ricibi den Parlamento, Oficina di Turismo (ATA), cu a bin comparti informacion riba peticion di e Comision Fiho di Turismo, cu su persona ta presidi.
ATA a referi na nan plannan pa 2022 pero nan a duna mas informacion mirando, logicamente, e efectonan di e pandemia.
Ta conoci caba cu desde Januari e variante omicron a afecta Aruba hopi pisa, y a hinca e Isla den un codigo cu ta haci e situacion un tiki mas dificil, pa turistanan bin facilmente akinan. Sinembargo, e por a realiza cu nan a ricibi un cantidad di turista, relativamente cerca di locual a premira.
Di parti di ATA, a trece diferente punto dilanti y rapportnan cu ta keda indica cu Aruba ta hopi dependiente di turismo, y esaki ta confirma pa instancianan internacional, entre otro MFI.
Yarzagaray a indica cu na final di dia, locual ta mas importante ta e placa cu turismo ta genera pa Aruba, pa asina e economia por draai. E parlamentario a bisa cu ATA, logicamente, ta presenta su rol y ki influencia e ta hunga e ora ey, pa trece mas “tourism & credits” cual ta e placa, pero no obstante keda enfoca riba e parti di “high value, low impact”.
El a agrega cu mirando e hecho cu ya Aruba ta yegando na un nivel di capacidad halto, toch ta desea pa e impacto aki ta minimo riba e Isla.
Yarzagaray a indica cu ATA a presenta estadistica di e desaroyonan di ultimo tempo y riba kico e ta bay enfoca na 2022, mirando padilanti di awo sigui bay.
Pero esaki ta wordo afecta, dependiendo di con e desaroyo di covid y e comportacion di hende ta sigui, pues e ta keda dependiente di influencianan externo y interno di e pais, y esaki ta hacie hopi dificil.
