ORANJESTAD (AAN): Diaranzon mainta despues cu minister di Husticia Rocco Tjon a anuncia e proyecto di renovacion di ‘Huis van Bewaring’ di Guarda Nos Costa, hefe di GNC Richard Kramers a hiba palabra.
Durante un conferencia di prensa Kramers a bisa cu ta un dia grandi pa GNC.
“Nos ta wak cu trabaonan a cuminza, cu ta bay dura alrededor di 80 dia”.
Tabata tin un destaho publico cu a wordo gana pa e compania ALBO y asina aki nos ta bay tin un oficina nobo na Centro di Detencion, unda cu tur trabao ta bay ta bao di un solo dak.
For di hopi tempo nos tabata pidi pa nos no tin dos area di trabao sino 1 area di trabao, segun Kramers.
El a splica cu ta finalizando tambe e trabaonan pa loke ta e baraknan cu tin, pa asina por aloca alrededor di 160 persona.
“Nos ta bay por pasa e personanan cu ta detencion awor for di e containernan pa e area di barak”.
Apesar di e hecho cu e containernan ta cumpli cu tur rekisito pa ta un cel, nos kier pone esnan den detencion den un area cu ta mas na nan fabor, esta mas fresco y mas grandi, pa nan hospeda durante e dianan cu nan ta wardando pa wordo deporta, segun Kramers.
El a sigui bisa cu esaki ta un proyecto cu a wordo regla for di fondonan di e asina yama ‘Bestedingsplan’, cu a cuminza na 2020.
Segun e hefe di GNC, problemanan di financiamento a trece un retrazo un tiki grandi cune, pero awor a yega asina leu cu e trabaonan a cuminza.
“Nos ta spera cu den e prome siman di Juni e proyecto wordo entrega y nos ta bay cuminza implementa e programa cu yama ACTPOL cu KPA y Kustwacht ta usando pa haci reportenan di trabao, pa asina moderniza tambe e sistema di raporta e trabaonan cu ta wordo haci diariamente.
Tambe nos ta bay tin un programa cu yama SBEER, pa asina comunica cu e diensten cu ta cay bao di ministerio di Husticia, pa asina nos por intercambia di informacion, segun Kramer.
