Oficialmente Sashah ta back den frontline di Tsunami

Cancion nobo di ‘BiN’ a wordo lanza tambe

ORANJESTAD (AAN): Despues di 10 aña, pa e artista Sashah, tabata un experiencia cu a trece hopi emocion y satisfaccion, grabando un biaha mas cu su banda faborito di tur tempo Tsunami Aruba

   Un soño cu a bira realidad y principalmente, haciendo esaki cu un propio composicion cu ta hiba como titulo “BiN”, a hacie aun mas special.

   E proyecto aki, cu origen basa riba e esencia di "Ritmo Tsunami", ta significa, reconecta profundamente cu e estilo musical y e sonido unico, cu a sa di defini Tsunami durante añanan.

E alegria di crea musica hunto atrobe, tabata sublime.

   Cada momento di preparacion di e cancion, tabata yena cu e energia, di no solamente coleganan/integrantenan talentoso, sino tambe di tur cu tin e conexion extenso y cu ta compronde e rumbo di Tsunami.

   Pesey nan a declara: “Sumamente agradecido, pa e oportunidad aki. Sumamente contento, pa bolbe sinti e magia, cu na prome instante a inspira nos.”

  Trahando riba e cancion nobo "BiN", a permiti pa mescla e estilo "Tsunami" cu influencianan nobo, creando algo cu ta sinti fresco y cu ta trece e nostalgia familiar.

   E regreso di e origen di e "Ritmo Tsunami", presentando "BiN", no ta solamente pa bay back den tempo sino tambe pa celebra Tsunami su 20 aña di existencia, mirando padilanti y mirando tur locual tin pa Tsunami den futuro.

   "BiN", ta un recordatorio di con conhuntamente na principio, Tsunami a cuminsa cu forza y pasion cu su musica y un recordatorio di con a comparti esaki semper.  Esnan cu kier mira e videoclip nobo por check e website:

www.bit.ly/binsashah

  Tsunami a bin pa keda y lo tey pa produci mas composicion manera esunnan cu semper a worde gusta, pa asina sigui biba e legado di Tsunami Aruba.

  Tin e oportunidad pa cada persona na mundo henter. Disfruta di e tema “BiN”, na cualkier momento di dia. E cancion ta obtenibel riba tur plataforma social y plataforma di transmision, incluyendo esunan mas popular, djis pa menciona algun cu ta Spotify, Deezer, Tidal, iHeart Radio, Pandora y Youtube Music. Riba Apple Music y Amazon Music, tambe e lo ta obtenibel.