E debilidad den genera coriente
- Awor ta haya mas informe up-to-date fo’i diferente partner
- Preparando pa un ‘piek’ grandi na September venidero
ORANJESTAD (AAN): Ultimo lunanan a bin tuma nota cu den region di Caribe, y e.o. hasta na Guyana na parti mas panort di Sur America, diferente pais a bin ta confrontando cierto nivel di crisis pa loke ta regarda produccion y tambe suministro di coriente.
Expertonan ta mustra cu e aumento promedio di calor ta trece dolor di cabez pa tur compania di distribucion di electricidad, debi cu componentenan electrico ta keinta demasiado y ta faya. Recien mes por a nota con un planta relativamente nobo na Republica Dominicana a sufri un fayo inmensamente grandi na un Substation, y tur esey debi na calor.
Pero ademas di distribucion di coriente, tin dolor di cabez grandi tambe cu e forma cu ta genera coriente. Diripiente paisnan grandi y islanan den Caribe ta haya nan confronta cu e cantidad di MegaWatt di coriente cu nan ta produciendo tur e añanan aki, diripiente no ta suficiente. E tin di haber cu varios factor, e.o. dificultadnan tecnico cu ekipo di genera coriente. Pero tambe e tin di haber cu e hecho cu sea e pais of e isla a conoce un crecimento inespera di mas hende, mas cas, mas negoshi, y mas industria.
Guyana a core busca un barco grandi cu por produci coriente, pa asina mara na nan waf y conecta riba e grid nacional pa yuda cu e tantisimo blackout. Aruba recien, como tambe St. Maarten a manda busca diferente Generator-Containers cu ta bin full prepara den containernan di sea 20 of 40 pia, cu ta djis start y tin di interconecta cu e grid di coriente.
Demanda a crece aki: Den un entrevista cu Alfredo Koolman, kende ta director di WEB Aruba NV, el a splica cu e situacion cu ta constata riba e isla, ta cu diripiente Aruba a conoce un crecimento enorme, di tal magnitud cu no a yega di conoce nunca antes.
Aunke e ta confirma cu den decada di 1990 e isla aki a conoce un ‘Economic Boom’, unda a conoce un crecimento di 5 pa 6 porciento e tempo aya. Pero awor den decada cu a start na 2020, Aruba a conoce un crecimento mucho mas halto, di entre 10 pa 15 porciento. Enbista di esey, WEB Aruba NV como compania estatal tin di duna contribucion na desaroyo positivo economicamente.
Pero ora bo tin esaki riba bo schouder, e compania tin di traha plan a base di ‘proyeccionnan’ y tin di tuma medida. Esey ta loke WEB Aruba NV a haci tambe pa asina purba na adapta na e crecimento barbaro aki.
Pa esey, e compania tin un plan “short-term”, “mid-term”, y “long-term” cu nan ta trahando riba dje. Koolman a splica cu nan short-term a encera busca Generator-Containers di compania Hulandes pa bin duna un man. Pa mid-term nan ta trahando riba un parke di bateria cu ta yuda wanta suministro di coriente pa alivia e Motornan RECIP. Pa long-term ta poni pa amplia capacidad di motornan RECIP pa genera coriente.
Loke ta crucial ta cu tin di cuminsa haci mas uso di proyectonan sostenibel, pasobra como cu Aruba tin biento y hopi solo, por usa Solar-Panels pa warda energia den bateria pa asina usa esaki den cualkier downtime. Y como cu tin hopi biento, tin di haci bon uso di dje, como cu e ‘costo di produccion’ di molina di biento ta hopi mas abao compara cu panelnan solar. Esaki ta algo cu e ingenieronan na WEB Aruba NV ta considera algo importante.
Koolman ta kere cu tin di haci mas uso di molina di biento lo mas pronto posibel, como cu e ta algo esencial. Na Curaçao mes tambe nan ta ricibiendo fin di e luna aki un cargamento di 5 molina extra di biento. E sistemanan aki lo alivia e dolor di cabes cu WEB ta den dje aworaki, y cu nan lo por maneha.
Alfredo Koolman a indica cu e tin tur confiansa cu a base di e forma di traha na WEB, di traha responsabel, traha plan, y ehecuta plan, e sa cu nan por cumpli cu e demanda pa isla.
Pa evita cu mas crecimento lo por bin “di sorpresa” den scochi di WEB, nan a cuminza cuminza haya informacion mas constante di e.o. AHATA, Camara di Comercio, Banco Central di Aruba, y otro instancia cu tin dato cu lo por duna indicacion si lo tin mas proyecto grandi na caminda den futuro cercano, etc. E ora por anticipa kico tin den periodonan venidero, incluyendo Hotelnan nobo.
Na 2023, e compania WEB Aruba NV a conoce ‘piek’ di genera coriente di como 150 MW, y awor ta anticipa cu pa September/October 2024 lo tin un ‘piek’ di 170 MW. Pues ta binti MegaWatt mas hopi.
