Oficialmente Aruba Doet 2022 a cuminza

ORANJESTAD (AAN): E aña aki CEDE Aruba den colaboracion cu Oranje Fonds pa di diez biaha a organiza e evento di boluntario Aruba Doet.

   Gobernador Alfonso Boekhoudt riba Diabierna mainta a habri e evento oficialmente. E ceremonia di apertura a tuma luga na Fundacion Centro Famia na Piedra Plat den presencia di miembronan di prensa.

   Den su discurso Gobernador a enfatisa e importancia di trabao di boluntario y a refleha ariba e resultado di 10 aña Aruba Doet. Como inicio oficial di e proyecto, Gobernador a pinta un ‘10’ riba un muraya di Fundacion Centro Famia. E empleadonan di Gabinete di Gobernador tambe a duna nan aporte na elugar aki cu verfmento.

   Potretnan aki pa cortesia Kabinet di Gobernador.