Ocho empleado mas na Hospital ta logra certifica pa Basis Acute Zorg

Un grupo disciplina y dedica na brinda miho cuido ta certifica awo

ORANJESTAD (AAN): Siman pasa na Dr. Horacio Oduber Hospital a tuma luga un ceremonia virtual na unda a otorga na entre otro 8 empleado di HOH nan certificado cu ta identifica e gran logro cu ta hiba e number “Basis Acute Zorg” (BAZ).

   E trayecto aki a inicia durante pandemia como parti di e programa di enseñanza di Caribbean Health Academy (Caribha) financia pa Hulanda. Otro hospitalnan den region tambe ta participa y asina hunto un total di 27 studiante ta termina di engtre otro Fundashon Mariadal na Bonaire, Curaçao Medical Center na Curaçao y tambe ImSan na Aruba. Despues di e estudio aki e studiantenan por sigui cu e trayecto pa specialisa den Cuido Intensivo, Cuido Cardiaco, Recovery y tambe Departamento di Emergencia.

  “Mi ta masha orguyoso di mira e gran resultado aki”, tabata e prome palabranan di sr. Jacco Vroegop di Hunta di Directiva di HOH.

    Esaki no lo por a worde realisa sin ayudo di VWS Hulanda y VUmc Amstel Academie. Ta fantastico di mira e certificacion aki y cu 7 di e 8 colega lo continua cu e siguiente trayectoria y asina por conta riba sigui eleva calidad di conocimento den nos cuido medico. Nan a experiencia diferente situacionnan di pashent y a atende y siña debidamente. Como directiva di Hospital lo sigui traha activamente y kier colabora mas ainda riba educacion den nos region. Esaki sigur ta un logro grandi pa hospital, pa nos comunidad y pa nan mes. “Masha pabien”, asina e director a finalisa bisando.

   Dwight Lopez, studiante di BAZ, durante su discurso a yama tur hende bonbini y a gradici tur cu a brinda nan sosten durante tur e lunanan cu nan tabata bezig. Alavez el a gradici VWS pa e oportunidad aki, caminda online nan por a traha hunto cu demas colega di Bonaire y Curaçao. “Nos a siña observa y comunica di un manera metodico”, Lopez a splica esunnan presente. El a finalisa bisando cu ta spera cu e cooperacion entre Hospital y VUmc por sigui crece.

   Jenieva Bartholomew, otro studiante di BAZ actualmente ta riba e piso di Cuido Intensivo haciendo su stage. Locual mas e ta gusta di e estudio ta cu e por desaroya su conocemento y e ta mira e certificacion aki como un ‘stepping stone’ pa crece mas den conocemento y brinda un cuido di calidad.

   Daisy van Leeuwen, Clinical Teacher in opleiding, a duna di conoce cu e estudio aki a cuminsa cu un etapa di preparacion na juni den cuater parti, caminda den grupo e studiantenan ta siña brinda cuido den caso di un situacion agudo. Shete di e studiantenan aki lo continua awo cu e estudio di cual 5 lo sigui den cardiac care y 2 den intensive care. Esaki ta nifica cu dentro di algun tempo, Aruba lo por conta riba nan experiencia y dinamismo ofreciendo cuido di calidad halto segun estudio renombra.

  Hospital ta felicita tur empleado cu a logra certifica pa Basis Acute Zorg esta Dwight Lopez, Giorgio Amadtjais, Surayma Tromp, Stephanie Ras, Nicole Lin-Tsung, Gilly Maduro, Jenieva Bartolomew y Shirley Kerpens. Nan ta aplaudi nan pa nan dedicacion pa continua y logra mas pa eleva calidad di cuido na HOH y Aruba.