WILLEMSTAD: Ministro S. van Heydoorn a yega na un acuerdo cu Universidad Iberoamérica, y tambe Universidad Latina de Costa Rica.
Continuando riba e mision pa habri horizonte nobo pa studiantenan, Ministro di Enseñanza, Ciencia, Cultura, y Deporte a sigui crea oportunidad pa studiantenan di Curaçao por studia den region.
Na Costa Rica, Ministro van Heydoorn a cera e acuerdo aki. Na ambos Universidad ya caba tin studiantenan di Curaçao ta sigui les eynan. E delegacion di Curaçao a haya chens di combersa cu e studiantenan ey, pa asina conoce nan experiencia y haya sa tambe di nan retonan.
Aworaki na Curaçao, ya tin mas cu 20 studiante kendenan a finaliza nan estudio di Docter na Costa Rica. E delegacion di Curaçao a bishita tambe Universidad de Ciencias Medicas (UCIMED), cu ta un universidad cu ya caba Curaçao tin un acuerdo firma cune, unda aworaki ya tin 35 studiante ta hayando les eynan.
E facultad medico di UCIMED ta keto bay maneha pa un Arubiano, kende a studia y gradua na e Universidad mes, esta Dr. Jose Sprok.
Na tur e Universidadnan aki, y anan no ta haci uso di curpa humano pa e studiantenan practica medicina ariba, pero e practica ta tuma lugar cu popchinan computariza cu por simula e diferente situacionnan di un curpa humano. E delegacion di Curaçao a keda impresiona pa e calidad di material cu e Universidadnan aki ta haci uso di dje. Ta bon pa menciona cu e Embahador di Reino Hulandes na Costa Rica, esta Christine Pirenne a acompaña e delegacion di Curaçao na tur e encuentronan.
Riba Diabierna anochi, e Embahador a organiza un cena na su cas pa e delegacion di Curaçao cu a cera conoci y dialoga cu Ministro di Enseñanza di Costa Rica, esta Katharina Muller. Tabatey tambe varios autoridad di nivel halto di enseñanza di Costa Rica.
Meta di e acuerdonan aki haci door di Curaçao, ta pa e studiantenan studia mas cerca di cas, y asina regresa bek nan isla y tambe pa evita mas ‘brain drain’.
