Presidente di Parlamento Marlon Sneek
*Tin un Landsverordening cu mester cumpli cu ne!
ORANJESTAD (AAN) – Presidente di Parlamento señor Marlon Sneek, den entrevista cu Matutino DIARIO, riba e pregunta kico Gobierno ta spera pa huramenta e dos ministernan cu falta pa completa Gabinete AVP-FUTURO, a contesta cu e ta kere cu gobierno kier huramenta ambos den e mesun ceremonia.
No obstante, e ta pensa cu kizas gobierno ta bay huramenta Minister Plenipotenciario, tanten cu e caso di Mike de Meza wordo resolvi.
“Nos tin un ley di screening, y ta di lamenta ora di mira oponentenan politico purba di crea polemica rond di un tema cu ta duidelijk. Tin un Landsverordening, cu bo tin cu cumpli cu cierto rekisitonan, pa e ora ey bo wordo ‘overgedragen’. Awo nos tur sa cu tin un caso den Corte. Esey kiermen cu e rekisitonan no ta na ordo ”, Sneek a señala.
Esey kiermen, e ta indica, cu Formador, Minister Presidente no por caba di forma su Gabinete pasobra un di e miembronan su documentonan no ta na ordo, basa riba un Landsverordening. Ta di Corte señor de Meza lo haya sa pakico tin un Caso entrega contra dje y di kico e ta wordo sospecha.
“E contesta nos tur tin e y bo por crea e impresion, y nos ta mira e fraccion di PPA cu ta reta ken…no tin nada di reta, simplemente si bo no cumpli cu e Landsverordening bo no por ‘draag voor’ e nomber.
Si Prome Minister bin Parlamento, esey ta bisa bo”, Presidente di Parlamento a remarca.
El a añadi: “Si bo ta stima bo pais y bo kier pa bo pais bay bon, tin cosnan cu bo por haci politica cu ne y tin cosnan cu bo sa bon, bon, con nan ta hinca den otro y con bo tin cu cana. Tin di nos cu, individualmente, ta wak cu otro bril, cu otro pensamento riba dje, esey ta claro, pero mi ta kere cu un di e cosnan cu nos tin cu garantiza ta di keda bringa pa nos por drecha e trias politica, eigenlijk”, Parlamentario Marlon Sneek a vocifera.
Cu enberdad e confianza den cada un di e trias aki tey, y cu cada un cu ta forma parti di e trias politica duna contenido na loke ta spera di nan, pa bo no crea e impresion cu tin caminda cu no ta canando corecto.
