Ochenta porciento di e mal holo na RWZI Bubali lo wordo elimina pa 1 di November 2024

Minister Ursell Arends a indica:

*Despues lo bin 8 siman extra pa elimina e holo completamente 

ORANJESTAD (AAN):   Minister Ursell Arends a duna di conoce cu awor cu Aruba Waste Water Solutions (AWSS) ta oficialmente lansa y cu e trahadonan di DOW a pasa over pa AWSS tin un plan tecnico cu a keda presenta cu ta duna claridad riba e direccion di RWZI Bubali, pero tambe e RWZI Parkietenbos y esun na Zeewijk.

            E minister a menciona cu ta bay tin inversionnan cu ta bay tuma luga inmediatamente. Pa 1 di November 2024 mester bin caba cambionan drastico principalmente na RWZI Bubali caminda 80% di e holo lo wordo elimina.

              Despues di e periodo aki lo tin rond di 8 siman extra pa e holo wordo elimina completamente. Ta haci inversion di ekiponan, makinaria nobo pa agrega na e operacion cu tin na RWZI Bubali. Unabes esaki keda cla lo cuminsa prepara pa construi e RWZI nobo cual lo ta un proyecto 'state-of-the-art' cu lo laga tur e problema aki pa pasado, Minister Arends a splica.

            RWZI tin un total di 52 aña bieu. E necesidad di inversionnan pa mantene operacional y cumpli cu tur standard no a tuma luga durante e añanan. P'esey a privatisa esaki y aworaki ta haya e fondonan necesario pa inverti y percura pa e problema aki pasa pa pasado, e mandatario a declara.