Abogado local a logra habri bufete legal na Hulanda

Ministro Plenipotenciario tabata presente

ORANJESTAD (AAN): Informe di Den Haag ta indica cu recientemente a tuma luga apertura di oficina di abogado Meijer David Kock na municipio di Den Haag. Señora Kaushilya Budhu Lall, partner di su bufete a inicia e apertura cu su discurso unda el a duna di conoce cu abogado David Kock a aserka su casa Meijer pa un caso na Hulanda. Despues di esaki nan ta cumpli 20 aña di amistad. Lamentablemente 4 aña pasa su casa a fayece.

   Na e ocasion aki tambe tabata presente embahador di Suriname mr. Rajendre Khargi  y Ministro Plenipotenciario di Aruba, mr. Juan Thijsen.
   E tabata un atardi placentero, na unda mr. Thijsen tambe a duna su discurso unda el a felicita e dos bufete di abogado cu a uni pa bin cu un solo nomber. Señor Thijsen a sigui bisa cu e ta contento cu nos yiunan di tera tin e voluntad, forsa y perseverancia pa tambe expande nan compania den exterior.

   Minister Plenipotenciario a splika cu e conoce abogado David Kock prome cu el a drenta política. Señor Thijsen tabata traha na Sindicato FTA, como consehero jurídico. E tempo ey abogado Kock tabata traha pa abogado Swaen, cu tabata e bufete di abogado pa FTA. Despues cu Thijsen mes a bira abogado y cuminsa traha na bufete dí abogado Van der Kuyp el a bira colega di abogado David Kock.

   Señor Thijsen a sigui splica cu como parlamentario el a topa atrobe cu David den un diferente rol como miembro di Raad di Advies y despues cu el a bira Ministro Plenipotenciario y representante pa Aruba na Europa Uni, David a bira presidente di Raad di Advies.

  Minister Plenipotenciario Thijsen a duna un palabra di elogio na abogado Abogado Kock, ya cu e ta un ehempel pa nos hoben nan. Tambe un bon abogado, presidente di Raad di Advies y principalmente un bon persona y un excelente empresario. Abogado Kock ta traha cu diferente socio den exterior manera Colombia, Miami y awor na Hulanda. Banda di su trabao pisa a haya tempo pa cuminsa na Alto Vista un Winery cu a bira un atraccion turístico y pa nos Arubiano cu ta amante di biña.

   Minister Plenipotenciario, señor Thijsen a desea tanto abogado Meijer y abogado David Kock tur clase di exito.