Oceano ta birando hopi cayente y lo impacta e temporada di Horcan 2021

ORANJESTAD (AAN): Oceano Atlantico ta un di e zonanan global clave cu ta afecta grandemente e tempo y clima di Merca y Europa. 

Den ultimo simannan, a detecta awanan di oceano cu ta mas cayente cu normal den e oceano subtropical di Noord Atlantico, cu ta conoci historicamente di tin un coneccion importante pa cu e temporada di Horcan.

   Tempo rond mundo ta den un fluho constante, conecta via di espacio y tempo.  Danki na satelitenan por sigui e movimento di nubia y e sistemanan di presion rond mundo.  Tur e movimento aki ta causa pa e cambionan di presion y biento, cu ta hunga un rol crucial den e conexion entre oceano y atmosfera.

   BIENTONAN OCEANICO GLOBAL:

   Bientonan passaat ta e biento principal di pariba cu ta circula mundo cerca di equator.  Nan ta mas fuerte y mas consistente riba oceano compara cu riba tera.  Bientonan passaat hopi biaha ta produci condicionnan di cielo parcialmente nubla, caracteriza pa algun nubia bentabal cu no ta hopi profundo, of tambe cielo sin nubia cu ta haci e islanan cu bientonan passaat un lugar preferi pa turistanan.

   Su velocidad promedio ta di como 5 pa 6 meter pa seconde (18 pa 21 km/h), pero por subi te na velocidad di 13 meter pa seconde (47 km/h) of mas.  Bientonan passaat (‘trade winds’) a haya e nomber di e tripulantenan di botonan di bela cu tabata depende di biento ora cu nan ta cruza oceano direccion west.

   Ora cu a check imagennan di high-resolution pa Oceano Atlantico, for di comienzo di aña te cu Mei 2021, nan a mira cu e area di oceano for di Zuidoost di Merca te na West-Europa, ta pasando den cambionan rapido.  E temperaturanan abnormal aki ta bin debi na cambionan den forza di biento di passaat.  Specialmente a nota con rapido lama a bira mas cayente for di April drentando luna di Mei.

   Bientonan passaat normalmente ta supla di pariba of di noordoost.  Ora cu nan ta supla riba oceano, nan ta fria e superficie di lama door di transporta aire mas frieu.  Pero lo mas importante, nan ta afecta tambe e coriente di lama y pone cu e awa mas hundo y frieu subi bin na halto na e superficie di lama.  Pero bientonan passaat mas debil por nifica net lo contrario, esta cu ta laga lamanan calmo cu menos mezcla, permitiendo e temperatura di lama pa subi.

   PRESION Y CAYENTE PA 2021:

   E mapa grandi aki ta un analisis di oceano haci Diasabra 15 di Mei 2021 ta mustra con temperaturanan di lama ta mas frieu den parti pariba di Atlantico, compara cu e banda west.  Bientonan passaat ta fria e superficie di oceano for di West Africa pabao te na Atlantico Tropical.  Bo por mira e coriente fuerte di lama cayente for di costa oost di Merca.  Esey ta e famoso Gulf Stream.

   Na April 2021, cambionan den e patronchinan di presion a start cu un cambio den e forza di bientonan passaat.  Debi na esey, bientonan passaat tabata mas debil riba e oceano subtropical di Noord Atlantico, y esey a pone cu e superficie di lama a bira fuertemente mas cayente.

   Bientonan ta wordo crea pa cambionan den presion di aire, pues ta importante pa check na kico a pasa cu e patronchinan di presion den Noord Atlantic desde April.  Di e forma aki, lo por compronde mihor con cambionan di presion por afecta temperaturanan di oceano.

   A bin detecta cu e sistema di presion riba Noord Atlantico a reverse completamente, cu presion halto dominante awor te na parti mas panort di Atlantico, y presion abao abao den subtropico.

   Pesey awor tin awa mas cayente cu normal banda di costa di Spaña y noordwest di Africa.  E bientonan passaat ta debil y no ta friando oceano como debe ser.

   E resultado ta fuerte!  Temperatura di awa a bira mas halto cu normal, extendiendo e evento di haci oceano cayente for di noordwest Africa te na subtropical Atlantico, y rumbo pa Norte America.  El a bira mas grandi compara cu luna pasa.

   E grafico ta mustrabo tambe con e temperatura a cambia riba Oceano Atlantico for di 15 di Februari te cu 15 di Mei 2021.  E tabata te na 18.9º Celsius y a subi bay te na 20.8º Celsius.

  Algun computer models a pronostica cu na luna di Juni, por keda mira e subtropical Noord Atlantico keda mas cayente cu normal.  Esey nifica cu oceano lo ta yena cu energia, cu por wordo usa pa sistemanan di tempo y patronchinan di presion.  E ta un influencia directo riba sistemanan tropical.

   Nunca un oceano mas cayente cu normal ta un bon señal net prome cu temporada di Horcan ta start dia 1 di Juni 2021.

   Un estudio haci di 1982 te cu 2019 door di NOAA na Merca, a mustra cu oceano cayente durante periodo di primavera, lo nifica un temporada di Horcan hopi activo mes.  Y tur cos ta mustra cu Temporada di Horcan 2021 lo ta uno hopi activo, y ya caba den fin di siman e prome sistema tropical ‘Ana’ a nace den Noord Atlantico.